Мемлекет басшысы Қасым-Жомарт Тоқаевтың тікелей қолдауымен соңғы жылдары елімізде ұлттық спорт түрлері қарқынды дамып келеді.
Бұл бағытта ауданда жүйелі жұмыстар ұйымдастырылып, спортшылар жоғары нәтижелер мен көрсеткіштерге қол жеткізіп жүр.
Сөзімізге дәлел, сәрсенбі күні Атырау облыстық бәйге федерациясының ұйымдастыруымен «Ұлы дала тұлпарлары 2024» атты облыс атбегілеріне арналған жылдың қорытынды шарасында Мақат ауданының «Алаш» ұлттық ат спорт федерациясы жылдың «Үздік федерациясы» атанды.
Аталған шараның мақсаты – атадан қалған дәстүрді жалғап, ат баптау, көкпар тарту секілді ұлттық спорт ойындарын кеңінен дәріптеп, көкпар ұлттық ойынында жетістікке жеткен спортшыларды үлгі етіп, сый-құрмет көрсету болды.
Сондай-ақ игі шара барысында өткен жылдың қорытындысы бойынша аудан мерейін асырып жүрген мақаттық шабандоздар мен бірқатар ұлттық спорт жанашырлары арнайы алғыс хаттармен марапатталды.
Әсем ҚАСЫМ
