Жас қанат

Кеше, Махамбет атындағы қазақ академиялық драма театрында көңілді тапқырлар клубы арасында Атырау облысының Кубогы үшін республикалық фестиваль өтті. Халықаралық жастар күніне орай ұйымдастырылған дүбірлі додада он команда бақ сынады. Уытты әзілдерімен күлдіріп отырып ой салатын «жайдарманшылар» арасынан 1-орынды (1 млн.теңге сертификат) көршілес Орал қаласынан келген «Талант» құрамасы жеңіп алды. Ал, «Үздік ойыншы» болып «Индер» құрамасынан Бірлес Бакетов танылды. Жас буын өкілдерін айтулы мерекемен облыс әкімінің атынан оның орынбасары Марат Мурзиев құттықтап, ойын қатысушыларына сәттілік тіледі.

Облыс әкімі Серік Шәпкеновтің төрағалығымен жастар ісі жөніндегі кеңес өтті. 

Жиында «Бизнестің жол картасы – 2025» мемлекеттік бағдарламасы аясында жас кәсіпкерлерді қолдауға бағытталған жұмыстар туралы облыстық кәсіпкерлік және туризм басқармасының басшысының міндетін атқарушы Нұрдәулет Жұмаситов баяндама жасады. Оның айтуынша, биыл осы бағдарламаға бюджеттен 11,4 млрд теңге бөлінді  (ЖБ – 2,2 млрд тг, РБ – 9,2 млрд тг). 

Бүгінде несие сомасы 27,4 млрд теңге болатын 584 кәсіпкердің жобасы қолдау тапты. Осылайша қосымша 536 жаңа жұмыс орны ашылады деп күтіліп отыр. Оның ішінде жастардың үлесі – 46%. Яғни 268 жас кәсіпкер қолдау алды. Сонымен қатар, Ұлттық жоба шеңберінде ісін жаңа бастаған кәсіпкерлер мен кәсіп ашуға ниеттілерге мемлекеттік грант беру конкурсына бюджеттен 106 млн теңге бөлінді. Оны осы жылдың қыркүйек айында өткізу жоспарланды. 

Облыс әкімі «Бизнестің жол картасы – 2025» мемлекеттік бағдарламасының игілігін көпшілік көруі үшін түсіндіру жұмыстарын күшейтуді тапсырды.

- Бизнес бастаушы не әлеуметтік жобамен айналысушы жастарға қойылатын шартты тағы бір қарап шығуымыз қажет. Өз кәсібін ашамын деушілерге ақпараттық насихат жұмыстарын жүргізіп, қолдау беру керек. Оларды құжатын тапсырып, не ақпарат алуы үшін әр бөлімге сандалтпай, жастар ресурстық орталығының мекемесіне тиісті мамандарды шақырып, «бір терезе» қағидатын ұйымдастыруды қарастырыңыздар,-деді С.Шәпкенов.

Сонымен қатар жиында жастарды жұмыспен қамту мәселесі көтерілді. Жыл басынан бері жұмыспен қамту орталықтарына хабарласқан 10 718 жастың 3 478-і жұмысқа орналастырылды. Бұл туралы облыстық жұмыспен қамтуды үйлестіру және әлеуметтік бағдарламалар басқармасының басшысы Азамат Мәмбетов айтып өтті. 

– Мемлекет тарапынан ұлттық жоба шеңберінде жастар үшін «Жастар практикасы», «Ұрпақтар келісімшарты», «Алғашқы жұмыс орны» жобалары жүзеге асып келеді. Оның ішінде жоғары және орта кәсіптік оқу орындарын аяқтаған жас түлектер үшін «Жастар практикасы» жобасына 1 481 адамды жұмысқа орналастыру жоспарланды. Сонымен қатар жұмыс тәжірибесі жоқ NEET санатындағы жастарға арналған  «Алғашқы жұмыс орны» жобасына 271 жас жұмыспен қамтылады. Бүгінде осы жоба аясында 141 адам жұмыс істейді. Халықты жұмыспен қамту орталықтарында тіркелген жұмыссыз адамдарға арналған «Ұрпақтар келісімшарты» жобасына 23 адамды қамту жоспарланып, 3 адам жұмыс істеп жатыр,-деді А.Мәмбетов.

Атырау қаласында орналасқан жастардың денсаулық сақтау орталықтарындағы қызметі туралы денсаулық сақтау басқармасының басшысы Қайсар Абдалиев баяндама жасады. 

Аймақта жастарға медициналық-әлеуметтік көмекті 4 аудан орталығының жастар денсаулық кабинеттерімен және қала бойынша №1,2,3,4,5,7, Геолог емханалар және Дамбы дәрігерлік амбулаториясы жанындағы бастапқы жастар денсаулық орталықтары жүзеге асырады. 2023 жылдың І жартыжылдығында  Атырау облысы бойынша мамандардың көмегін алған пациенттер саны – 15606. Оның ішінде гинекологқа 2 731, урологқа 1 160, дерматовенеролог 862, психологқа 2 525, психиатрға 7 713 адам жүгінді. Олардың 1 398-і емделді, 1 509 адам сауықтырылса, 816-ның жағдайы бір қалыпты, - деді Қ. Абдалиев. 

Жиынға қатысушылар балаларды қорлау,  мектеп оқушыларын жыныстық сауаттылыққа үйрету секілді мәселелерді де көтерілді.

- Кәмелетке толмағандар арасында қылмыстық істер артып келеді. Сондықтан бұрын білім беру басқармасы жанында болған орталықты тәрбие жұмыстары және кәмелетке толмағандардың істері жөніндегі орталық етіп қайта жасақтауды ұсынамын. Өйткені бала тәрбиесімен тікелей айналысатын орталықтар білім беру басқармасында жоқ ,-деді Ж.Бисембиев.

Бұл ұсынысты облыс әкімі Серік Шәпкенов қолдайтынын айтты. Осы ретте балалар арасындағы қоқан-лоқы, жәбір көрсету  мәселесінде жұмыстарды жіті назарда ұстауды тапсырды. Ал денсаулық сақтау басқармасының жанындағы орталықты жастарға кеңінен насихаттау, мамандардың ем алушыларға ашықтығын қамтамасыз етуді жүктеді. 

– Денсаулық сақтау басқармасы жанындағы орталықты жастар біле бермейді. Сондықтан мұндай сауықтыру орталықтарының бар екенін жастарға жеткізу керек. Балалар арасындағы буллинг, оларды жәбірлеу мәселелері басқа орталықта қаралу керек. Ең үлкен мәселе – жасынан зорлық-зомбылыққа ұшыраған баланың ешкімге ашыла алмауы. Іштен тынып, булығып жүреді. Үйіндегі адамдарға айта алмайды, ортада ешкім қорғамайды. Соңы өкінішті жағдайға әкеліп соғады. Сондықтан мамандар балалар мен жастардың психологиясымен, тәрбиесімен айналысу керек. Орталықта ашықтықты қамтамасыз етіліп, пациент мамандарға сену керек,-деді С.Шәпкенов.
 

Сонымен қатар жиында аудандардағы Жастар ресурстық орталығының жұмысы, жастар арасында құқықбұзушылықтың алдын алу және  адами құндылықтарды насихаттауға бағытталған іс-шаралар жоспарының орындалуы қаралды.

Шілде айының 25-і күні аудандық жастар ресурстық орталығының ғимаратында «ATYRAU QUIZ» ойындарының аудандық іріктеу кезеңі өтті.

Атырау облысы Ішкі саясат басқармасының қолдауымен өткен шараны «Жеті жарғы» қоғамдық қоры мен «Жастар Рухы» жастар қанатының Атырау облыстық филиалы ұйымдастырды.

Облыстық ойынға берілетін үш жолдамаға ауданымыздың алты командасы таласты. Олар: жастар ресурстық орталығының «ЖасStar», Л.Шахатов атындағы орта мектептің «Number one», Доссор мәдениет үйінің «Өнерлі жастар», аудан әкімдігі қызметкерлерінің «Мегамозг», аудан еріктілерінен құралған «Кеттік, поехали, let’s go» және құрамында әртүрлі сала өкілдері бар «BasTime» командалары еді.

Алдымен барлық командалар «Кіріспе» турында тест жауаптарын белгіледі. Кейін сөзжұмбақ шешіп, суреттерге қарап кинофильмдердің атауын тапты. Ал ойынның екінші бөлігінде бір тақырып аясындағы сұрақтар мен қисын сұрақтардың шешімін тауып, ақтық мәреде сенімді жауаптарына бәс тікті.

Тартысты өткен куиздың нәтижесінде үшінші орын «Өнерлі жастар», екінші орын «Кеттік, поехали, let’s go» және бірінші орын «BasTime» командасына бұйырды. Барлық жүлдегерлер 9 тамыз күні облыстық ойында аудан намысын қорғайтын болады.

«Облыс жастарының зияткерлік білім деңгейін арттыру мақсатында «ATYRAU QUIZ» жобасы бастау алған болатын. Қазіргі таңда ойындар жеті аудан мен Атырау қаласында ұйымдастырылуда. Iріктеуден өткен 22 команда келесі кезеңге жолдама алады. Облыстық куиздың жүлде қоры - 500 000 теңге», - дейді «Жеті жарғы» қоғамдық қорының төрағасы Абылай Құрметұлы.

А.Жұмабекұлы

 

Қорғаныс министрлігі қандай аурулар бойынша әскерге шақырылғандар босатылатынын түсіндірді. Бұл туралы Stan.kz хабарлайды.

Азаматтарды мерзімді әскери қызметке шақырудан босатуға жататын аурулардың тізбесі "Қазақстан Республикасының Қарулы Күштерінде, басқа да әскерлері мен әскери құрылымдарында қызмет өткеру үшін адамдар денсаулық жағдайына қойылатын талаптарды бекіту туралы" Қорғаныс министрінің 2020 жылғы 22 желтоқсандағы № 722 бұйрығымен бекітілген.

"Бұл тұрғыда адамдар ішкі ағза аурулары, хирургиялық патология, неврология, көз ауруы және басқа да дертке қатысты мерзімді әскери қызметке шақырудан босатылады", – делінген қорғаныс министрлігінің жауабында.

Айта кетсек, бұған дейін Қорғаныс министрлігі қай санаттағы адамдар әскери қызметтен босатылуы мүмкін екенін және әскер қатарына шақырылмайтынын түсіндірген болатын.

Бұл тұрғыда кейінге қалдыру отбасы әрі денсаулық жағдайына, оқуын жалғастырғандарға, кәсіби қызметін атқарып жүрген педагогтерге, ауылдағы дәрігерлерге, Парламенттің немесе жергiлiктi өкiлдi органдардың депутаттарына қатысты болады.

Сондай-ақ, алдын ала тергеу амалдарына тартылған немесе қылмыстық iсін сот қарап жатқан адамдар жауынгерлік жиындарға шақыртылмайды.

Бұдан бөлек, азаматтық әуе кемелерінің ұшу экипажының мүшелеріне, тиісті білімі бар азаматтық авиация инженерлері, механиктері және техниктеріне, сондай-ақ құқық қорғау органдарының білім беру ұйымдарында алғашқы кәсіптік даярлықтан өтіп жатқандарға қатысты әскерге шақыруды кейінге қалдыру тәртібі қарастырылған.

ФОТОГАЛЕРЕЯ

Біріңғай мемлекеттік байланыс

AqPrint

Байланыс номерi :     +7 702 132 03 32      +77122458521