Мақат мұнай және газ технологиялық колледжінде «Тіршіліктің негізі – салауатты болашақ!» ұранымен кіші аяқ добынан оқушылар арасында аудандық жарыс өтті.
Спорттың бұқаралылығын арттырып, салауатты өмір салтын қалыптастыру және кәсіптік бағдарлау жұмыстарын насихаттау мақсатында өткізілген сайысқа А.Құнанбаев, М.Баймұханов, Х.Санбаев, Б.Қанатбаев, С.Шәріпов мектеп-интернаты, О.Сарғұнанов атындағы орта мектептерінің оқушылары қатысып, әдемі ойын өрнегін көрсетті. Ойын өте тартысты, әрі қызықты өтті. Қатысушылары өздерінің біліктіліктері мен мықты дене шынықтыру дайындықтарын көрсетті. Ойын басталысымен, қос тарап та бір-біріне дәл соққыларымен, тегеурінді шабуылдарымен әрекет жасап, ойынды қыздыра түсті.
Жас футболшылардың үздік ойындары мен белсенділіктерін ескеріп, ойын соңында бірінші орынды М.Баймұханов атындағы орта мектебі, екінші орынды Б.Қанатбаев атындағы орта мектебі, үшінші орынды А.Құнанбаев атындағы орта мектебі командалары иеленсе, бірнеше оқушылар «Үздік шабуылшы», «Үздік қақпашы», «Үздік қорғаушы» атауларымен марапатталды.
Келешекте спорт саласындағы жастарымыздың саны артып, осындай жарыстар өз жалғасын таба берсін деген тілектеміз.
М.СЕРІКҚЫЗЫ.
