Аудандық білім беру бөлімінің ұйымдастыруымен дәстүрлі мектепке дейінгі білім беру ұйымдары тәрбиеленушілері арасында «Болашаққа – білімді, дені сау ұрпақ» ұранымен спорттық-интеллектуалдық эстафета ойындары өтті.
Б.Қанатбаев атындағы орта мектеп базасында өткізілген аудандық сайыс балалардың ой-өрісін дамыту арқылы, салауатты өмір салтын насихаттауды мақсат етті. Бүлдіршіндердің интеллектуалды қабілеттері мен спорттық белсенділігін саралайтын жарысқа «Болашақ», «Қарлығаш», №54, «Сандуғаш», «Балбөбек», «Нұрбөбек», «Бәйгетөбе», «Әсел», «Ботақан» бөбекжай балабақшаларының 4-5 жастағы 10 бүлдіршіннен құралған топ қатысты. Шараның ашылу салтанатына қатысқан кент әкімі Е.Ермағамбетов балаларға тартысты ойын мен нәтижелі жеңіс тіледі. Сайыс бағдарламасының алғашқы бөлімінде балалар кедергілер арқылы өтіп, санды кубиктерді ретімен орналастыруға тырысты. Келесі кезеңде тунелдің ортасынан өтіп, математикалық есептерді шығарды. Сондай-ақ, бүлдіршіндер санды кубиктерді тігінен жинап және әріп кубиктерден сөз құрастырды. Кезекті бөлімде жұмсақ ойыншықтарды үй және жабайы жануар ретінде бөліп, тор себетке толтырып жарысты. Соңғы бөлімде барлық команда мүшелері бірігіп, кубиктерден төртбұрыш жасау арқылы қарсыластарынан оза шабуға талпынды. Балалар спорттық - интеллектуалдық эстафета ойынында жарыса жүріп, әр тапсырманы жігерлене орындады. Ойын барысында белсенділік танытып, тәтті қылықтарымен көзге түскен бүлдіршіндер болды.
Сайыс қорытындысы бойынша «Бәйгетөбе» балабақша кешенінің «Сұңқар» тобы ІІІ орын, «Қарлығаш» бөбекжай-балабақшасының «Улыбка» тобы ІІ орын, «Болашақ» бөбекжай-балабақшасы «Самғау» тобы І орынға ие болды. Жарыс ережесі бойынша ауданның мектепке дейінгі білім беру ұйымдары тәрбиеленушілерінің намысын облыстық кезеңде «Самғау тобы» қорғайтын болады. Сайыс соңында жеңімпаз командаларға кубок пен медаль табыс етіліп, дипломмен марапатталды.
М.ІЗТҰРҒАНОВА,
Сурет автордікі.
