Жақында Атырау қаласында Атырау аймақтық дене тәрбиесі және спортты дамыту орталығының қолдауымен оқушылар арасында баскетболдан облыстық мектеп лигасы өтті.
Аталмыш сайысқа облыс бойынша 8 команда қатысты. Б.Қанатбаев атындағы орта мектебінің денешынықтыру пәні мұғалімі Ербол Китенбаев дайындаған оқушылар жарыс жолында аудан намысын қорғап қайтты. Үш күнге созылған ойын тартысты да, қызықты өтті. Аудан баскетболшылары алғашқы кездесулерін сәтті бастап, ақтық сынға дейін сүрінбей жетті. Ақтық сында қарсыласына жол берген жерлестеріміз турнирдің күміс жүлдесін иеленді. Алғашқы ойында аудан баскетболшылары Индер ауданын 44:34 ұпайымен жеңіп, кезекті ойында 34:14 ұпайымен Қызылқоға ауданынан үздік шығып, шешуші кезеңге жолдама алды. Ширек финалда Махамбет ауданын 20:0 ұпайымен айқын басымдылықпен ұтса, финалдық бәсекеде Атырау қаласы командасына есе жіберді.
Осылайша, спортшылар былтырғы нәтижелерін сақтап, күміс жүлдегерлер атанды. Жеңімпаздар мен жүлдегерлерге медаль, диплом және ұйымдастырушылардың атынан сыйлықтар табысталды.
М.ІЗТҰРҒАНОВА.
