Республика күніне орай Доссор балалар және жасөспірімдер спорт мектебінің ұжымы «Жанашыр жүрек» атты қайырымдылық акциясын ұйымдастырды. 

Акция барысында көпбалалы және мүмкіндігі шектеулі балалары бар отбасыға азық-түлік себетін табастады. Әдіскер маман Анар Амантайқызының айтуынша, көпбалалы отбасының балалары спорт мектебінің шәкірттері.

«Қайырымдылық жасау ең ізгі қасиеттердің бірі. Ал оның ең абзалы – мұқтаж жандарға көмектесу. Осы ретте ұжымымызбен бірге жақсылық жасап, өзгеге қуаныш сыйлауды жөн көрдік. Азық-түлік табысталған отбасының үш баласы бүгінде Доссор балалар жасөспірімдер спорт мектебінде жаттығады. Бапкерлері де болашақта олардан зор үміт күтеді», - дейді Анар Амантайқызы.

«Қайырымдылық жасасаң, қайырын көресің» демекші, осылайша қайырлы істің ұршығын иірген ұжым нағыз адамгершіліктің үлгісін көрсете білді.

Ә.ҚАСЫМ