Атырау қаласында 29-30 мамыр күндері өткен «Атырау ЭТНО–FEST» этномәдени фестивалінде Мақат ауданы жүлделі І орынды иеленді.
Өңірлер арасындағы достықты, мәдени байланысты арттырып, жергілікті өнерпаздардың шығармашылығын кеңінен насихаттау, сондай-ақ қазақтың ұлттық өнері мен дәстүрін жаңғыртып, жас ұрпаққа үлгі етуді мақсат еткен фестивальге облысқа қарасты 7 аудан белсене қатысты.
Әр аудан өз ерекшеліктерін, салт-дәстүрі мен өнерін көпшілікке таныстырып, этноауыл түрінде безендірілген көрмелер мен сахналық қойылымдар ұсынды.
Мақаттықтар да өздерінің ұлттық киімдерімен ерекшеленіп, тарихи тұрмыс-салт бұйымдары қойылған экспозицияны көпшілік назарына ұсынып, домбырамен орындалған күйлер мен қазақы нақыштағы хореографиялық билер көрермендерге ерекше әсер қалдырды.
Сондай-ақ, этнофестивальде жасанды интеллект рөлін ойнаған әртістер көрермендерге ауданнан шыққан ұлы тұлғалар туралы тарихи деректер мен ақпараттарды ұсынуы көпшілік көңілінен шықты.
Фестивальдің екінші күні 7 аудан мен Атырау қаласының көркем өнерпаздары гала концерт қойып, өз өнерлерін ортаға салды.
Екі күнге созылған этно фестивальдің нәтижесінде Мақат ауданы жүлделі I орынды жеңіп алып, 3 миллион теңге көлемінде ақшалай сыйлыққа ие болды.
Фестиваль соңында Мақат ауданы әкімінің міндетін атқарушы Әсел Қаржауова мақаттықтарды айтулы жеңіспен құттықтап, аудан өнерпаздарына алғысын білдірді.
Бұл жеңіс – ауданымыздың рухани байлығының, бірлігінің және мәдени ұстанымының жарқын көрінісі.
Ж.Қамза
Сурет автордікі
