Мүмкіндігі шектеулі жастарға кедергісіз орта қалыптастыру, өмір сүру сапасын арттыру және өмірдің барлық салаларында қызметтерге қолжетімділігін қамтамасыз ету мәселелерін шешу үшін аудандық мәдениет үйінде «Жұлдызай» өнер фестивалі өткізілді.
Өнерін өміріне балайтын, еш мүсіркеуді қажет етпейтін, бойындағы дарынын жасырып қалуды жөн санамайтын жұлдыздай жарқыраған ерекше балалар шарада түрлі қолөнер туындыларын ұсынып, ән-биден шашу шашты.
Фестивалдің негізгі мақсаты аудандағы ерекше балалардың өнерге деген көзқарасын дамыту, бойындағы шығармашылық қасиеттерін ашу еді. Алдымен көрермендер үшін мәдениет үйінің фойесінде қолөнер және бейнелеу өнері жанрларындағы туындылардан көрме ұйымдастырылды. Одан әрі қатысушылар мәдениет үйі сахнасында ән айтып, би билеп, көркемсөз оқыды.
Шара соңында аудандық мәдениет, тілдерді дамыту, дене шынықтыру және спорт бөлімінің басшысы Н.Исполов барлық балаларға арнайы дипломдар мен сыйлықтарды табыстады.
А.ЕСЖАН
