Аптаның дүйсенбісінде Мақат кенті әкімі аппаратының ұйымдастыруымен 1 қазан - Халықаралық қарттар күні мерекесіне орай «Ардагерлерді ардақтайық» атты ардагерлер арасында шахматтан жарыс өтті.
Салауатты өмір салтын қалыптастыру мақсатында өткен шараға әртүрлі саладан бес ардагер қатысып, өзара бақ сынады.
Төрт айналымға жалғасқан тартысты ойын нәтижесінде Ғалымжан Сариев ІІІ орынға, Қуанышқали Қуатов ІІ орынға табан тіреді.
Ал, қатарластарынан оқ бойы оза шапқан Естай Ғинаятов І орынды иеленді.
Сонымен қатар, үздік ойын көрсете білген Марат Нұрманов және Максим Исмагулов Мақат кентінің әкімінің алғыс хатымен марапатталды.
Шара соңында жарысқа қатысқан қазыналы қарттарға дипломдар, медальдар және естелік сыйлықтары табыс етілді.
Айта кетейік, шараның өтуіне «Гүлмира» дүкенінің иесі Геннади Биманов демеушілік танытқан болатын.
Ботакөз Асхатқызы
