Осындай тақырыпта аптаның сейсенбісі күні аудандық мәдениет үйі жанындағы ұжымдар мен көркемөнерпаздардың есептік концерті болып өтті.

Аталған кешке жергілікті тұрғындар асыға жетіп, мәдениет үйі залын лық толтырды. Кеш өтетін сәтті асыға күткен көрермендер арасында еңкейген кәрі мен еңбектеген балаға дейін табылды. Осыдан-ақ, жергілікті тұрғындардың өнерді қашанда жоғары бағалайтынын аңғаруға болады.

Концерт басы «Шаттық» үлгілі би ансамблі мен Мәди Маңғыстауовтың сомдауындағы қойылыммен ашылды. Одан әрі сахна төрінде «Мақат әуендері» вокалды-аспапты ансамблі мен «Ардагерлер» ансамблі ән шырқап, кеш көркін қыздыра түсті. Бұдай кейін көрермендер «Ғинаятовтар» жанұялық ансамблі мен Ерасыл Мұсаев, Айзада Хабиболлаева, Ернар Бекболаттың бірлесе орындауындағы күй тартысына куә болды.

Одан бөлек, халықтың көзайымына айналған аудандық мәдениет үйі жанындағы халықтық театр әртістерінің әзілдік қойылымдары да көптің көңілінен шығып, күлкіге қарқ қылды.

Сондай-ақ республикалық байқаулардың жеңімпазы атанып жүрген «Шаттық» үлгілі би ансамблі ортаға шыққанда мың бұралған бишілердің өнері жиналған көпшілікті тәнті етіп, Жасұлан Базарбаев, Алтай және Нұрсәт Сәрсенбаевтар, Әскер Нұрманов, Мейрамбек Құрманғазиев, Мереке Тілеуқұлова, Сымбат Маңғыстаудың орындауындағы әуезді әндері көтеріңкі көңіл-күй сыйлады.

Одан әрі Кенжебике Төлебаева мен Раушан Әлиева халық әнін, Азамат Елубайдың орындауындағы «Бір шәугім шәй» әні көптің көңілінен шыға білді. Концерт соңы жергілікті ақын Нұрбек Сарбасовтың әнге лайықталып жазылған, Құрал Молжановтың «Бірлігі жарасқан» әнімен түйінделді.

Концерт соңында сахна төріне аудан әкімінің міндетін уақытша атқарушы Бекәділ Жайкин көтеріліп, барша өнерпаздарға өз алғысын білдіріп, әсерлі кеш сыйлаған аудандық мәдениет үйі ұжымына аудан әкімінің алғыс хаты мен естелік сыйлық және ықылас гүлін тарту етті. Арнайы сөз алған аудандық мәдениет тілдерді дамыту, дене шынықтыру және спорт бөлімінің басшысы Нұрлан Исполов өнер ұжымына арнайы тілегін айтып, өз атынан «Ғинаятовтар» жанұялық ансамбліне, А.Сәрсенбаев, Ә.Нұрманов, Ж.Есмұханов, М.Тілеуқұлова, С.Маңғыстау сынды өнерпаздарға алғыс хаттар мен естелік сыйлықтар табыстады. Кеш соңында жиналған халық рухани демалып, жақсы көңіл-күйде тарқасты.

Ә.ҚАСЫМ