Атырау қаласында облыстық дене шынықтырау және спорт басқармасы сондай-ақ, бокс федерациясының ұйымдастыруымен бокстан облыстық іріктеу чемпионаты өткен болатын.
2007-2008 жылы туылған жасөспірімдер арасында ұйымдастырылған додаға ауданнан алты боксшы қатысып, оның екеуі жеңіс тұғырынан көрінді.
Атап айтқанда, Мақат балалар және жасөспірімдер спорт мектебінің шәкірттері 48 келі салмақта Нұрмұхаммед Алдаберген І орын иеленсе, 60 келі салмақта Исламбек Беркінғали ІІ орынмен марапатталды.
Сайыс қорытындысы нәтижесінде Нұрмұхаммед Жамбыл облысы Шу қаласында өтетін Оңтүстік-Батыс аймақтық іріктеу чемпионатына қатысуға жолдама алды.
«Қазіргі күні Нұрмұхаммед Атырау қаласында оқу-жаттығудан өтіп жатыр. Дайындықты бастап кеттік, өйткені аймақтық іріктеу келесі айға жоспарлануда. Жалпы оның жарысқа деген бабы жақсы. Сондай-ақ, ол жыл басынан 5 рет чемпион атанды. Облыстың намысын қорғайтын бұл додада да шәкіртіме сенім артамын»,- дейді бапкері Парасат Құлмұханов.