5 қазан – Ұстаздар күніне орай аудандық мәдениет үйінде аудандық білім бөлімінің ұйымдастыруымен «Ұстаз – мектептің жүрегі» атты мерекелік шара болып өтті.
Салтанатты шара басында сахна төріне кішкентай бүлдіршіндер шығып, ұстаздар қауымын жылдағы игі дәстүр бойынша төл мерекемен құттықтады. Одан әрі сөз алған аудан әкімінің орынбасары Ербол Ермағамбетов құттықтау сөз сөйлеп, ізгі-тілегін жеткізді.
«Қадірлі білім беру саласының ардагерлері мен қызметкерлері! Сіздерді кәсіби мерекелеріңіз – Ұстаздар күнімен құттықтаймын! Сіздердің тынымсыз еңбектеріңіздің арқасында алда талай елін сүйетін, білімді жастардың шығарына кәміл сенеміз. Ұстаз деген ұлағатты есімді қастерлеп, ауданымыздың білім саласының дамуына өлшеусіз үлес қосып, талантты шәкірттер тәрбиелеп келесіздер. Еліміздің ертеңі мен кемел келешегі үшін жасап жатқан қызметтеріңізге табыс, зор денсаулық, отбасыларыңызға амандық тілеймін!», - деді өз сөзінде.
Сондай-ақ, ол сала ардагерлері мен бүгінде оқушыларды білім нәрімен сусындатып жүрген ұстаздарға аудан әкімі атынан арнайы алғыс хат табыстап, гүл шоқтарын ұсынды.
Одан әрі құттықтау тілегін жеткізген аудандық мәслихат төрағасы Азамат Шаңғалаев пен «АMANAT» партиясы аудандық филиалының төрайымы Әсел Шайзадақызы мерекелік лебіздерін білдіріп, бірқатар ұстаздарды марапаттады.
Сонымен қатар аудандық білім бөлімінің басшысы Айбол Долдашев пен Білім және ғылым қызметкерлері кәсіптік одағының ауданық комитеті филиалының төрағасы Ерболат Құлтаев сахна төріне шақырылып, ауданның білім беру саласын дамытуға зор үлесін қосып жүрген ұстаздарға арнайы алғыс хат табыс етті.
Салтанатты іс-шара соңы аудан өнерпаздарының мерекелік концертімен жалғасты.
Ә.ҚАСЫМ
