Домбыра – халқымыздың жүрегінен шыққан сыр, ұлт руханиятының қайнар көзі. Бұл қасиетті аспапты құрметтеу – тек өткенге тағзым емес, болашаққа аманат деп білеміз.
Л. Шахатов атындағы мектебімізде жас ұрпаққа ұлттық мұрамыз – домбыраны үйретіп, оның тілімен сөйлету жолында еңбек етіп келемін. Әсіресе, түрлі ұлт өкілдерінің осы аспапқа қызығушылық танытып, оны меңгеруге талпынуы – ел бірлігінің, мәдениетке деген құрметтің айқын дәлелі.
Скоп Арианна, Енина Зинаида, Михайлова София секілді шәкірттеріміздің «Балбырауын», «Кеңес», «Жастар биі» сынды халық күйлерін нақышына келтіріп орындауы – еңбегіміздің жемісі. Бұл – тек күй үйрену емес, бұл – ұрпақ бойына ұлттық тәрбие мен рухани байлықты сіңіру.
Домбыра күні – әр қазақтың кеудесіне мақтаныш сезімін ұялататын айтулы мереке. Ұлттық аспабымызды насихаттай отырып, жас ұрпақтың бойында ұлттық сана мен рухты қалыптастыру – басты мақсатымыз.
Алма Лесқызы,
Л.Шахатов атындағы орта мектебінің музыка пәнінің мұғалімі, педагог-шебер, Ы.Алтынсарин төсбелгісінің иегері
