6 қазан күні Ресей елінің Астрахань қаласында Ресей мен Қазақстан арасында менталды арифметика бойынша алғаш рет флеш баттл ретінде Халықаралық олимпиадасы өткен болатын.
Аталмыш олимпиадаға Қазақстан құрама командасы атынан Мақат ауданы бойынша 6 оқушы қатысып, нәтижесінде барлығы да жүлделі орындарға ие болды.
Одан бөлек, облыстық «Фариза оқулары» байқауына қатысып жүлделі І орынды иеленген Х.Санбаев атындағы орта мектебінің 10 сынып оқушысы Маңғыстау Сымбат та қатысты.
Осы ретте бүгін аудан әкімі Азамат Мәмбетов Халықаралық олимпиададан жүлделі орындарға ие болған оқушылар мен олардың ұстаздарын қабылдады.
Аудан басшысы өз сөзінде ауданымыз үшін бұл үлкен жетістік екендігін айтып, оқушыларға әрдайым осы бағыттан таймай, ізденісте болыңдар деген тілегін білдірді.
Сонымен қатар, сауатты да білімді шәкірт тәрбиелеген ұстаздардың еңбегі зор екендігін айтып, өз алғысын жеткізді.
Кездесу соңында аудан әкімі Азамат Саматұлы алған білімдерінің арқасында ауданның атын шығарып, еліміздің намысын қорғаған оқушыларға арнайы естелік сыйлықтарын табыс етті.
Ә.ҚАСЫМ
