Аудан жұртшылығы үшін өнермен сусындаған апта болды. Әсіресе жергілікті әнсүйер қауым «ҚР Білім беру ісінің үздігі», «ҚР Тәуелсіздігінің 25 жылдығы» төс белгілерінің және ҚР Құрмет грамотасының иегері, Халықтық ұлт-аспаптар оркестрінің №1-ші домбырашысы, «Ғинаятовтар» жанұялық ансамблінің жетекшісі, күйші-сазгер Естай Ғинаятұлының 70 жылдық мерейтойына орай өткізілген «Мұнайлы менің мекенім» атты шығармашылық кешін асыға күтті.
Аудандық мәдениет үйінің ұйымдастыруымен өткен кеш «Шаттық» үлгілі би ансамблінің «Назбике» биімен ашылды.
Сонымен қатар республикалық, халықаралық байқаулардың жүлдегері, сазгер жерлесіміз Бақытбек Сартбаев жүргізген мерейтойлық концерттің бастапқы бөлігінде «Ардагерлер» ансамблінің орындауындағы кеш иесінің «Доссорым» және «Мұнайшылар маршы» әндері шырқалды. Әріптестерін құттықтай келген «Ардагерлер» ансамблі Естай Ғинаятұлына алғыс хат пен естелік сыйлық табыстады. Кейін аудандық білім бөлімінің басшысы Айбол Долдашев та кеш иесіне өз марапатын тапсырса, Доссор балалар өнер мектебінің директоры Мағзом Иманғалиев алғыс хат пен қоса домбыра тарту етті.
Облыс пен республикаға танымал өнерпаздар А.Сәрсенбаев, М.Мерғалиева, Ш.Өтемісова, Д.Құрмашев, Д.Еримов, Е.Мұсаев, Ш.Қонысбаева, А.Құбайдолла және «Ғинаятовтар» жанұялық ансамблі өнер көрсеткен кеш Қазақстан Республикасының «Мәдениет саласының үздігі» К.Төлебаева мен аудандық мәдениет үйінің көркемдік жетекшісі Р.Әлиеваның орындауындағы А.Елеусіновтың сөзіне жазылған, Е.Ғинаятұлының «Мұнайлы менің мекенім» әнімен қорытындыланды.
Шара соңында аудандық ардагерлер кеңесінің төрағасы Сәбит Халенов жүрек жарды лебізін білдірсе, аудандық мәдениет тілдерді дамыту, дене шынықтыру және спорт бөлімінің басшысы Нұрлан Исполов аудан әкімі атынан алғыс хат табыстап, мерейлі жасқа келген өнерпаздың иығына қазақы дәстүр бойынша шапан жапты. Сол сәтте Естай Ғинаятовтың замандас досы, доссорлық ақын Қуат Мыңтұрғанов кеш иесіне арналған өлеңін оқып, жиналған халықты жырмен тебірентті. Қорытынды сөз алған Естай Ғинаятұлы барша ұйымдастырушылар мен көрермендерге өзінің шексіз ризашылығын білдірді.
Осылайша, ХIХ-XX ғасырда Баянауыл даласын мекендеген аттасы Естай Беркімбайұлы секілді халықты әнге бөлеген маңдайымызға біткен жерлесіміз сүйікті тыңдармандарымен бір қауышып қалды.
А.Байшуақ
