Доссор кентіндегі Р.Ғабдиев атындағы өнер мектебінің бишілері Өзбекстан елінің Ташкент қаласында өткен халықаралық конкурста бас жүлдеге ие болды. 800-ден астам қатысушы бақ сынаған «ZHULDYZ ART KAZAKHSTAN» конкурсында би номинациясы бойынша «Гауһартас» биі тобы «Молдавские девчата» және «Айханша» би тобы қазақ биі «Балдәурен» биін мың бұрала билеп, жеңіс тұғырынан көрінді.
Шет ел асып өз таланттарын мойындатқан өнерпаздарды аудан жұртшылығы зор құрметпен күтіп алды.
Мақат теміржол вокзалына аудан әкімінің орынбасары Ербол Ермағамбетов бастап, аудандық ішкі саясат бөлімінің басшысы Естай Мақсотов, Р.Ғабдиев атындағы өнер мектебінің директоры Мағзом Иманғалиев және аудандық білім бөлімінің мамандары, ата-аналар мен ұстаздары жиналды.
Тек ауданның ғана емес, еліміздің мерейін үстем еткен бишілерге аудан әкімінің орынбасары Ербол Ермағамбетов өз алғысын айтып, өнерлі балғындарға өз лебізін білдірді. Өз кезегінде аудандық білім бөлімінің тәрбие жұмысы және қосымша білім беру ұйымдары бойынша әдіскері Дулат Тастаев өнерпаздарға әрдайым жеңіс тұғырынан көрінуге тілектес болды.
Осы ретте би топтарының жетекшісі Нұргүл Еркінқызы шәкірттері таланттарын елімізде ғана емес, шет елде де дәлелдей білгеніне қуанышты екендігін жеткізіп, олармен мақтанатындығын айтып өтті. Сондай-ақ, ол ыстық ықылыспен күтіп алған жерлестеріне өз ризашылығын білдірді.
Ә.ҚАСЫМ
Суреттер автордікі
