Адамдар жиі шалдығатын аурулардың бірі деп тіс ауруын айтуға болады. Стоматолог болу табысты кәсіпке айналып, қалаларда стоматологиялық клиникалардың саны қанша артса да әрқайсысы тұрақты клиенттер базасын қалыптасытрып үлгеруде. Халық та қалталары қағылғанына қарамай денсаулықтары үшін сұраған ақшаны төлеуге мәжбүр.
Соның өзінде Мақат кентінің тұрғындары бұрынғыларының жұмыстарын тоқтатуына байланысты стоматологиялық клиникаларға жарымай қалды. Сол себептен тісін емдетем деген жұрт Доссорға немесе Атырауға барып сандалды.
Өткен аптада мақаттықтар үшін қуанышты жаңалық орын алды. Кенттің қақ ортасынан нақтырақ айтқанда «Болашақ» шағын маркеті ғимаратының үстіңгі қабатынан «Dias dent» стоматологиялық кабинеті ашылды. Ашылу салтанатына жергілікті тұрғындармен қатар Мақат кентінің әкімі Ербол Ермағанбетов, Атырау облысы Кәсіпкерлер палатасының Мақат ауданы бойынша филиалының директоры Гүлназ Едігеева, Мақат аудандық кәсіпкерлік және ауыл шаруашылығы бөлімінің басшысы Ерлан Нұрғандар қатысты.
Кент әкімі: «жақсы бір әлеуметтік маңызы бар нысан ашылып жатыр деп есептеймін. Халыққа сапалы қызмет көрсететін, игілігіне пайдаланылатын табысты клиника болсын», - деп тілек тілесе, бөлім басшысы: «шағын және орта кәсіптердің көп болуы ел экономикасының қаншалықты дамығандығын айқындайды. Сіздердің ашып тұрғаныңыз әсіресе біздің өңірге керек-ақ. Себебі айналымызда тіс ауру көптеп кездесуде. Тістер жұлына бермей, қолдан келгенше емделуі керек. Ауданымыздағы денсаулық саласын дамытуға үлес қосыңыздар. Абыройлы іс болсын!», - деп әкімнің сөзін жалғай кетті. Кейін кәсіпкерлер палатасы филиалының директоры мен кент тұрғындары да қолға алынып жатырған бастамаға сәттілік тіледі.
Кәсіп бастап жатқандар Жарбол Ідірісов пен Рүстем Бисалиев атты азаматтар. Бірі Мақат, бірі Ақтөбенің тумалары. Олар екеуара бірігіп, ешқандай мемлекеттік бағдарламасыз іс бастап тұр. «Стоматология клиникасын халықтың сұрауы бойынша ашып жатырмыз. Бұл қазіргі таңда сұранысқа ие қызмет көрсету түрі. Бағаларымыз салыстырмалы түрде қол жетімді болады. Зейнеткерлер мен мүгедектерге 15 % жеңілдіктер бар», - дейді Жарбол мен Рүстем.
Мақаттықтардың жүзінен голливуд күлкісін көре қалсаңыз осы жігіттердің еңбегі деп білерсіз.
А. Есжан
