Алматы қаласында «Өнер әлемі» шығармашылық орталығының ұйымдастыруымен «Тәуелсіздік, биік болсын тұғырың!» атты республикалық фестиваль-байқауы өткізілген болатын.
Тәуелсіздік күні мерекесі және Мемлекеттік гимн авторы Шәмші Қалдаяқовтың 90 жылдық мерейтойына арналған онлайн шараға аудандық мәдениет үйі жанындағы драма үйірмесінің оқушылары қатысқан болатын.
Еліміздің түкпір-түкпірінен өнерлі өрендер қатысқан сайыста ауданымыздың көркемсөзшілері мәнерлеп жатқа оқудан өз шеберліктерін танытып, жүлделі орындарға қол жеткізді.
Мәселен, Аяулым Сәду өзінің сөз өнерін биік бағалайтынын байқау барысында танытып, көркемсөз оқудың шебері атанып, бас жүлдені қанжығасына байлады.
Ал, Аяулым Ғайса, Айтөре Жеңісбекқызы, Ақбаян Саматқызы, Гүлсезім Нұрбергенқызы, Келбет Орынғали, Гүлжан Байсымақ, Азиза Жолдыбай, Арсен-Сәбит Мейлхат, Айсара Болатбайқызы, Дильяра Есенжанқызы І орынға ие болса, Айару Ғайса ІІ орынмен марапатталды.
Сондай-ақ, байқауға шәкірттерін зор ынтамен дайындап, «жүзден жүйрек, мыңнан тұлпар» атанған жас өнерпаздарға қолдау көрсеткені үшін тәлімгер Гүлбаршын Төленқызына «Үздік педагог» дипломы және кубогі табысталды.
М.СЕРІКҚЫЗЫ