Алматылық "Қайраттың" жүрген жері жәй ғана доп додасы емес, футзал мерекесі. Себебі дәл қазір солардың дәурені жүріп тұрған шақ.
Ойыншылары тек ел біріншілігінде емес, кәрі құрлықтың басты бәсекесінде де атой салып, азуын айға білеп жүр. Ел біріншілігінің кезекті XXXI туры аясында алматылықтар "Атырауға" қонаққа келген еді. Күнде қолға түсе бермейтін қадірлі меймандарымызбен біздің жерлестеріміз жақыннан жүздесті. Анығын айтқанда Мақат балалар жасөспірімдер спорт мектебінің шәкірттері футзалдан Қазақстан ұлттық құрамасы мен алматылық "Қайрат" командасының бас бапкері Паулу Рикардо Какамен екі сағат шеберлігін шыңдады. Жаттығу алаңына жиналған жас өрендеріміздің физикалық қабілетіне Кака бапкердің өзі таңдай қақты. Әлемдегі ең үздік бапкерлердің бірі дене дайындығынан бастап, біз біле бермейтін футзалдың өз құпияларымен бөлісті. Білікті бапкер "Бір минут бос тұрмауымыз керек. Максималды қозғалыс жасай отырып, дұрыс пас жеткізе білу, оңтайлы соққы жасай білуге шыңдалуымыз тиіс",-дейді. Ол үшін жедел шешім қабылдау керектігі айтпаса түсінікті.
Жаттығудан кейін Кака бапкер өз ойын ортаға салып, сұрақтарға жауап берді.
"Басты мақсат - футзалды дамыту. Тіпті сабақ ретінде мектеп бағдарламасына енгізсек, қазақ тілінде әдістемелік кітаптар шығарсақ. Жас мамандарды көптеп дайындасақ",-дейді ол. Мақаттықтардың мұндай әрекетіне балаша қуанып жүрген спорт жанашыры Марат Нұрмақов ағай да осы ортадан табыла кетіп, көкейіндегі бірнеше сауалын жолдады. Балаларымыздың жаттығу деңгейіне қандай баға бересіз деген сауалға Кака бас бармағын көтеріп "өте жақсы" деп жауап берді. "Бұл балалар қазақ футзалының болашағы. Дайындықтары да тым тәуір. Техникалық мүмкіндіктеріне де көңілім толды",- деген ол
сондай-ақ ағайдың Алматыға барып "Қайрат" командасымен ашық жаттығу жұмыстарын жасауға болады ма деген ұсынысын қуана қабылдап, кез-келген уақытта хабарласуға мүмкіндік бар екенін жеткізді.
А.САДЫҚОВ
