"Үмбеті үлгі еткен-әз Мұхаммед" атты сайыс бүгін Атырау қаласындағы Абай орталығында өтті.
Атырау облысы дін істері басқармасы және Атырау облыстық орталық «Иманғали» мешіті ұйымдастырған білім бәсекесінің басты мақсаты – қоғамда рухани құндылықтарды дәріптеу еді.
«Қоғамның тұрақты болуы, жат қылықтардан арылу – шын мәнінде санаға байланысты. Мұндай зияткерлік сайыстар адамды рухани байытады», - деді Атырау облысы дін істері басқармасының басшысы Хайролла Көшқалиев. Алдымен іріктеу турында 120 үміткер Quizizz мобильді қосымшасы арқылы 30 сұраққа тест түрінде жауап беріп, үздік шыққан 30 адам I турға жолдама алған болатын. Олар 6 топқа бөлініп, әртүрлі деңгейдегі жазбаша және бейнесұрақтардан тұрған II турдан кейін 5 жігіт қана жарысты жалғастыруға мүмкіндік алды. Қайтадан мобильді қосымша арқылы үздіктер анықталғанда оза шыққан үшеуі ақтық кезеңде "Мен Пайғамбарды көрсем не істер едім?" тақырыбында жазған эсселерін оқып берді. Қуанарлығы олардың екеуі мақаттық болды.
Қатысушыларға әділ бағаларын берген Қажымұқан Мұңайтпасов мешітінің имамы Айтжан Абдиров, «Анашым» мешітінің имамы Айдын Серікбаев және «Әт-Тақуа» мешітінің имамы Қанағат Муслимовтердің ортақ шешімімен қос бірдей жерлесіміз қарсыластарының алдынан көрінді.
Атап айтар болсақ, 2 орын және 200 мың теңге Мейрамбай Кереевтің қанжығасында кетсе, 1 орын және кіші қажылыққа жолдама Нұрлан Сармалаевқа бұйырды.
Атырау облысының бас имамы Алтынбек Ұтысханұлының айтуынша, республика бойынша бұрын-соңды болмаған осындай жарысты дәстүрге айналдыру жоспарда бар.
Асылбек ИЩАН
