Жақында Мақат кентіндегі Болашақ ықшам ауданында «Болашақ» аллеясының ашылу салтанаты өтті.
Ашылу салтанатында алдымен сөз алған аудан әкімі Азамат Мәмбетов аудан жұртшылығын жаңа аллеяның ашылуымен құттықтап, «Болашақ» аллеясы халықтың қолайлы ортада өмір сүруіне бағытталған жұмыстардың бірі екенін айтып өтті.
Сонымен қатар, аталмыш аллея ауыл қонақтары мен жергілікті тұрғындар үшін де тамаша демалыс орны болатындығын жеткізіп, оны күтіп-ұстауға шақырды.
Одан әрі аудан басшысы шара барысында «Болашақ» аллеясының құрылысына қосқан өлшеусіз үлесі үшін құрылыс жұмыстарына жауапты мердігер «СК алаш» ЖШС директоры Исатай Темірбаевға арнайы алғыс хат табыс етті.
Сондай-ақ құттықтаулар легін кент тұрғыны Ұлжан Шортабаева жалғап, «Болашақ» ықшам ауданының тұрғындары атынан аудан басшылығына ризашылығын білдірді.
Әрі қарай құрылысы көп жылдарға созылған нысаның лента қию рәсімі аудан әкімі Азамат Саматұлы мен ардагерлер кеңесінің төрағасы Сабит Халеновке жолданды.
Айта кетейік, «Болашақ» аллеясында резеңке төсеу және қоршау жұмыстары жүргізіліп, онда балалар ойын алаңшасы мен жарық шамдары орнатылған.
Ботакөз Асхатқызы
суреттер автордікі
