Аудандық балалар кітапханасында Атырау «Адалдық алаңы» жобалық кеңесінің аудандағы өкілі Күлпаш Әділбекқызы және аудандық жастар ресурстық орталығының бастамасымен «буккроссинг» кітап алмасу акциясы ұйымдастырылды. Акция жастарды кітап оқуға деген қызығушылығын арттыруды мақсат етті.
Кітап алмасу шарасына аудандық ардагерлер кеңесінің төрағасы Сәбит Сүлейменұлы, аудандық қоғамдық кеңесінің кеңестік төрағасы Шаяхмет Боқанұлы, кітапхана ұжымы және жастар қатысты.
С.Халенов кітап оқудың пайдасы туралы ғибратты әңгімелерін айта келе, өзінің оқыған кітаптарымен бөлісті. Сондай-ақ, әр бір жас жергілікті ақын, жазушылардың шығармашылығымен таныс болу керектігін тілге тиек етті. Тарихи кітаптарды оқу арқылы тың деректерге қанық болатынымызды әңгімелеп, қатысушыларға қазақ хандығының қалыптасуы туралы баяндалатын І.Есенберлиннің «Көшпенділер» триллогиясын оқуға кеңес берді.
Өз кезегінде К.Әділбекқызы ақын, әдеби қызметкер Б.Қорқытовтың «Атырау арыстары» кітабын жастарға оқуға ұсынды. Сонымен қатар, қазақ әдебиетінде үздік туындыларымен орын алатын классик жазушылар М.Әуезовтың, Ж.Аймауытовтың шығармаларының жинағын оқу жастардың борышы екенін айтып өтті.
Акцияға қатысушы жастар да өздеріне серік етіп, оқып жүрген кітаптарымен бөлісті. Көбі әдеби және психологиялық М.Әуезовтың «Абай жолы» романы, К.Бекжігітова «Ойыңды өзгертіп, өміріңді өзгерт», А.Баймұхаметовтың «Тастамашы ана» секілді кітаптарды оқып жатқандарын айтып сөз қозғады. Шара соңында өздері оқыған қызықты кітаптарды бір-бірімен алмастырды.
Технология атауы қанша дамып жатыр десек те қай заманда болмасын кітаптың орны биік тұрары сөзсіз. Алайда, қазіргі кезде кітапхана мен кітап дүкендеріне баратын жандардың азайып бара жатқандығы өкінішті. Біріне уақыт, екіншісіне қалтамыздың көтере бермейтіндігі сылтау. Ал бұл екі сылтауға да кедергі болуға «кітап алмастыру» акциясы көмектесе алатынын бұл шара дәлелдеп бергендей.
М.ІЗТҰРҒАНОВА
