14 қазан күні аудандық орталық кітапханада атыраулық исатайтанушы-ғалым, профессор Аманкелді Шамғонұлының «Ұлы дала батыры – Тайманның ұлы Исатай» атты тарихи-ғұмырнамалық кітабының тұсаукесер рәсімі өтті.
Кешке Исатай Тайманұлының 6-шы ұрпағы Қ.Қадрешов және аудан ардагерлері О.Деңгелбаев, Т.Жолмағанбетов, Ғ.Тастаев, Қ.Жаңғабылов, Е.Жоламанов қонақ болды.
30 жылдай уақыт Исатай мен Махамбет батырлар бастаған көтерілісті жан-жақты зерттеген Х.Досмұхамедов атындағы Атырау мемлекеттік университетінің профессоры, Қазақстанның үздік өлкетанушысы Аманкелді Шамғонұлы кітаптың мазмұнын оқырмандарға таныстырса, кітапхананың жас оқырмандары Айкөркем Мақсотова және Ермек Мейірлан Махамбеттің «Мінгені Исатайдың ақтабаны-ай», «Әй, Махамбет жолдасым» атты өлеңдерін оқыды.
Шара барысында профессордың шығармашылығына арналған «Өлке тарихының зергері» атты кітап көрмесі ұйымдастырылып, аудандық мәдениет үйінің әншілері Ж.Сисембаев пен Р.Әлиева әннен шашу шашты.
Аудан әкімі атынан сөз алған аппарат басшысы Б.Жайкин Аманкелді Шамғонұлына гүл шоқтары мен естелік сый-сияпат табыстады.
А.Жұмабекұлы
Суреттер автордан
