Қазақстан Республикасы «Сайлау туралы» Заңына енгізілген өзгерістер бойынша 2021 жылдан бастап, аудандық маңызы бар қала, ауыл және кент округтері әкімдерін тікелей сайлау жүзеге асырылуда. Соған сәйкес 8 қазан күні Доссор кенті әкімін сайлау өтті.
Аудандық аумақтық сайлау комиссиясының мәліметінше, сайлауға өзін-өзі ұсыну тәртібімен барлығы 3 кандидат құжат тапсырған. Олар – Алмаз Имашев – аудан әкімінің кеңесшісі, Нұрлан Исполов – аудандық мәдениет, тілдерді дамыту, дене шынықтыру және спорт бөлімінің басшысы және Аслан Қосмағамбетов – «Атырау облысы Су арнасы» КМК-ның Мақат аудандық бөлімше басшысы.
Тұрғындар өз таңдауын жасау үшін Доссор кентінен 5 сайлау учаскесі дайындалып, қажетті құралдармен және ақпараттық материалдармен қамтылды. Таңғы сағат 07:00-ден бастап дауыс беру орнында мемлекеттік әнұран шырқалып, жұмысқа кірісті. Осы уақыттан бастап сайлау учаскелері кешкі сағат 20:00-ге дейін жұмыс жасады. Аудандық аумақтық сайлау комиссиясы мамандарының айтуынша, сайлау талаптарға сай өтіп, ешқандай құқық бұзушылық тіркелмеген.
Саяси науқанға дауыс беру құқығына ие 7356 сайлаушының 3884-і қатысқан. Жарамсыз бюллетеньдер саны – 31, «Бәріне қарсымын» белгісіне белгі салғандар саны – 61.
Қорытынды бойынша А.Имашев – 241, Н.Исполов – 1449, А.Космағамбетов – 2102 дауыс жинады.
Кенттің жаңа әкімі Президент реформасының «Еститін мемлекет» жобасының көздейтінін мақсатын іске асыру жолында аянып қалмайды деп сенеміз.
М.ІЗТҰРҒАНОВА
