Күн мен түн теңелген шуақты мерекені Бәйгетөбе округіне қарасты Мұнай айдаушылар бекетінің тұрғындары да ұйымшылдықпен атап өтті.
Ауылда наурыз мерекесі ерекше тойланды. Бұл – 100 үй тату-тәтті ғұмыр кешіп жатқан, қаймағы бұзылмаған ауыл. Халқы – еңбекқор, мал, егін шаруашылығымен айналысады.
Мерекеге орай жастар ақшаңқан киіз үй құрып, ұлттық салт-дәстүрімізді дәріптеуде рухани шаралар көрініс табуына мұрындық болды. Бұл күні үлкені де, кішісі де ұйымшылдықпен мерекені өткізуге атсалысып, ұлттық киіммен жасана қалуы ұлт мәдениетіне деген зор құрметті танытты. Ал, қыз-жігіттер өз өнерлерін ортаға салып, ақ дастарханға жиналған жұртқа мерекелік көңіл-күй сыйлады.
Ауылдағы кішкентай өнерпаздар концерт қойып, мерекенің шырайын келтірді. Үлкендер бата беріп, берекелі істің болашағының жарқын болуын тіледі.
А.ТАУМҰРЫНОВА.