Он бірінші рет өткізіліп отырған «Мектепке жол» акциясы аз қамтылған және көп балалы отбасылардың оқушыларына көмек көрсетуге және әлеуметтік себептер бойынша балалардың мектепке бармауының алдын алуға бағытталған.
Акция кезінде мұқтаж жандарға көмектесуді, сондай-ақ демеушілік көмек көрсетуді қалайтын кез келген адам өз үлесін қоса алады.
«Мақат» қоғамдық қоры аталмыш акциядан құр қалмады. Олар 85 000 теңгеге жуық қаражатқа ауданымыздың 15 баласына сөмке толы оқу құралдарын алып берді. Жаңа оқу жылын су жаңа сөмкеге толы қажетті құрал-жабдықтармен бастаған балалар қамқор үлкендерге алғысын білдірді.
Қордың басшысы Ануар Жеңісұлы қор жұмысы мұнымен тоқтамайтынын, алда әлі талай демеушілік істерге ұйытқы болатынын айтып, жоспарымен бөлісті.
Айтқандай-ақ, аталмыш акцияға Сіз де қатысып, өз үлесіңізді қоса аласыз.
Е.МЫРЗА
Сурет: ашық дереккөз
