Талайдың көңіліне медеу сыйлап жүрген "Демеу" қайырымдылық дүкені Наурыз мерекесінің тұсында қазыналы қарттарымызға есігін айқара ашты.
Дүкеннің басы-қасынан табылып жүретін Шаяхмет Ишанғалиев атамыз жайылған шағын ғана дастарханның зор маңызға ие екенін жеткізіп, замандастарын келіп жеткен мерекемен құттықтады.
Өз кезегінде сөз алған аудандық аналар кеңесінің төрайымы К.Алишева да аталмыш ұжыммен тығыз қарым-қатынаста екенін жеткізіп, қариялардың дендеріне саулық тіледі. Кешегі күндерді көз алдарынан бір жүгіртіп өткен қариялар, бүгінгідей "қой үстіне бозторғай жұмыртқалаған заманның" бір-ақ сәтте орнай қоймағанын еске алысты.
Ізгі тілектер ақтарылып, қара домбырадан әсем әуендер төгілді. Базар ішінің кішкене бұрышынан орын тепкен берекелі дүкеннің бір күні осындай қызықтармен көмкерілді. Қарты бар елдің қазынасы ортайған ба, шіркін!
А.САДЫКОВ
