Жаңа жыл қарсаңында аудан спортының дамуына үлес қосып, ел мерейін көтеріп жүрген бір топ спортшылар марапат-сыйға ие болды.
Аудандық спорт бөлімінің ұйымдастыруымен бас қосқан жиында бөлімнің бас маманы Н.Исполов, спорт ардагерлері Т.Байгуршимов, Ә.Ерғожиев спортшыларды жаңа жылмен құттықтап, келер жылда да тың белестерді бағындыруларына сәттілік тіледі.
Жиында әлемдік додаларда топ жарып жүрген Серікболсын Шынтас, Ишан Галиев, Еламан Саясатов, т.б. спортшылармен қатар, аудан, облыс, республикалық, халықаралық жарыстар жүлдегерлері, ұлттық спорттың жеңімпаздары спорт бөлімінің атынан алғыс хат пен сый-сияпаттармен марапатталды.
Спорт ардагері Марат Нұрмақов барлық марапат иелерін құттықтап, жаңа жылдық лебізін білдірді.
Спортсүйер жұртшылықтың салауатты өмір салтын қалыптастыруда өз үлестерін қосып жүрген жанашырлықтарына ризашылығын жеткізіп, келер жылда да жігерлілік пен шалқар шабыт тіледі.
Жаңа жыл қарсаңында аудан басшылығының ілтипатына мерейленген спортшылар естелік суреттерге түсті.
Н.ЛЕНА.
Сурет автордікі.
