Аяулы ана, мөлдір махаббат, шынайы бақыт туралы тамаша әндер жазып, ән әлемінің падишасы атанған талант иесі, вальс королі, қазақ халқының ұлы мақтанышы, композитор Ш.Қалдаяқовтың туғанына 90 жыл толуына орай 9 тамыз күні «Сағындырған әндер-ай» атты аудан көркемөнерпаздары әлеуметтік желі арқылы онлайн концерт өткізді.
Концерттік бағдарлама аудандық мәдениет үйі халықтық театры әртістерінің көрінісімен ашылып, өнерпаздар А.Елубаев «Ана туралы жыр», ансамбль «Шәмші әндерінен попурри», Ж.Сисембаев «Сыған серенадасы» және «Бақыт құшағында», Б.Жалмұханов «Әнім сен едің!», Б.Әкімгереев «Теріскей» және «Дүнген қыз» сынды Шәмшінің ел ішіне кең танылған әсем әндерін шырқады.
Кешті «Шаттық» би тобының бишілері көрікті билерімен көркемдесе, мәдениет ошағының әртістері шағын қойылымды сахналады.
Концерт соңын Б.Мұханбетжанов пен М.Тұрсынғалиева «Шәмшіге арнау» атты әнмен қорытындылады. Әрқашан да Шәмшідей аяулы жанның ән ғұмыры әлі талай ұрпақтың ой-білімімен, парасатымен жаңаша жаңғырып жалғасын таба берері сөзсіз.
Өз тілшіміз
