Парламент Мәжілісі «Ха­лық денсаулығы мен ден­саулық сақтау жүйесі ту­ралы» кодекс жоба­сын екінші оқылымда қабыл­дады. Олар кодекс жоба­сында вак­цинация, донор­лық, транс­плантация, пси­хи­ка­лық және репродуктивті ден­саулық, скрининг, жеке меди­циналық мәліметтерді жинау мен темекі тұтынуды реттеуге қатысты норманы қарады.

Денсаулық сақтау министрі Елжан Біртанов Facebook па­рақшасында кодекстегі оң өз­геріске қатысты жазба жария­лады. Соның ішінде вакцина салдыруға айрықша тоқталып, ел ішін­дегі күмәнді сейілткендей болды.

Вакцина сапасы сын көтереді

Екпеге үрке қарайтындардың пікірінше, вакцинаның сапасы төмен. Бұл аргументке министр үзілді-кесілді қарсы шықты. Елі­мізде вакцина сапасын қа­да­ғалау тіркеу кезеңінен баста­лады. Дәрі-дәрмекті сарап­тау­­­дың ұлттық орталығы сарап­­­шы­лары алгоритмге сәй­кес стан­дартын тексереді. Екін­ші ана­ли­ти­калық кезеңде вакци­на­ларға лабора­тория­лық зерттеу жүргізеді. Кли­никалық зерт­теу тарихы мен вак­цинаның эпидемиологиялық тиімділігі тексерістен өтеді. Тіркелгеннен кейін вакциналардың әрбір партиясын қауіпсіздік пен сапа сынағы күтеді. Егер вакцина халықаралық ұйымдар арқылы сатып алынса, оның қауіпсіздігі мен сапасы ДДСҰ деңгейінде тексеріледі.

«Қазақстандағы әрбір вак­цина қауіпсіздік, тиімділігі мен сапасы бойынша көпсатылы тексерістен өтеді. Ол тексерістің бәрі де өндірістік тәжірибенің (GMP) халықаралық стан­дартына сай келеді», – деді ми­нистр.

Министр сөзін медицина ғылымдарының докторы Динагүл Аяпбекқызы да мақұлдады. ДДСҰ әр вакцинаға талдау жүргізетінін алға тартты. Вакцина сатып алуға қаражаты жетпейтін елге көмек қолын созатынын атап өтті. Ел арасында сапаға қатысты күмән осы мәселеге қатысты шықса керек-ті. Жоғары санатты дәрігер-инфекционист вакцина туралы ақпарат таратуда абай болуға шақырды.

«Вакцина туралы сөз қозғал­ғанда анамның айтқаны еске түседі. Өйткені 3 баласына қызылша шығып, бірінен соң бірі шетінеп кеткен. 40 жылдары қызылшаға қарсы вакцина жоқ болғасын қолдан ештеңе келмеді. Қазір медицинаның қауқары жетеді. Сондықтан көптің қанқу сөзіне ермей, екпенің адамзатқа келтірер пайдасына көз жұмуға болмайды», – дейді Астана ме­дициналық университетінің жұқпалы аурулар кафедрасының меңгерушісі.

aikyn.kz

Сурет: ашық дереккөз