25 қазан - Республика күніне орай аудандық мәдениет үйінде салтанатты шара өтті.
Салтанатты шара шымылдығы Қазақстан Республикасының Мемлекеттік Әнұранымен ашылды.
Одан әрі сөз алған аудан әкімі Азамат Мәмбетов аудан тұрғындарын атаулы мерекемен құттықтап, ұлттық мерекенің тарихына шолу жасады.
Ол бұл күннің Мемлекет басшысы Қасым-Жомарт Тоқаевтың ұсынысымен қайтарылып, ұлттық мереке ретінде қайта тойлануы тарихи шешім болғанын атап өтіп, ауданның әлеуметтік-экономикалық дамуына үлес қосқан бірқатар азаматтарды облыс, аудан әкімінің және облыстық мәслихат төрағасының алғыс хатымен марапаттады.
Сонымен қатар, өңірдің өркендеу жолында үлес қосқан әртүрлі сала ардагерлері мен қызметкерлеріне “Мақат ауданына - 100 жыл” мерекелік медалін табыстады.
Одан өзге, шара барысында мемлекеттік қызметке алғаш қабылданған қызметкерлер Қазақстан халқына адал әрі кәсіби қызмет етуге салтанатты түрде ант берді.
Шара соңы аудан көркемөнерпаздарының концерттік бағдарламасымен жалғасты.
Ботакөз Асхатқызы
Суреттер автордікі
