Көктем мезгілі жанға шуақ, көңілге жайлылық сыйлайтын уақыт. Осы көктемнің алғашқы айында атаулы мейрамдар да жетерлік. Соның бірі – халықаралық әйелдер күні.
Әр жыл сайын тойланатын, өмірді сұлулыққа толтыратын, жан жылуы мен сәулелі сезімге бөлейтін ерекше мейрам. Нәзік жандылардың көңіліне қуаныш, құшағын гүлге толтыратын айтулы күн.
Осы мерекеге арқау болған ана мен әйел затының мәртебесі дүйім дүниенің, жалпақ жалғанның бар асылынан әрдайым жоғары тұрады. Олар отбасы жылуы, баланың күлкісі сынды мәңгілік құндылықтармен қатар еліміздің дамуына өз үлестерін қосып жүрген аяулы жандар. Қос жүкті қатар арқалап жүрген әйел тұлғалары өз ісіне тиянақты, қажырлы еңбектерімен ұлттың болашағы үшін қызмет етуде. Сондай жандардың бірі - өз өмірін теміржол саласының дамуына арнап келе жатқан Қамажай Бағытова.
Ол 1964 жылы 24 сәуірде Сағыз станциясындағы теміржолшылар әулетінде өмірге келген. Кейіпкеріміздің әкесі Құлжан - құрметті теміржолшы, анасы Жұмақыз - ардагер теміржолшы. Олар Сағыз - Жантерек теміржол аралығында теміржолды қардан, құмнан қорғау мақсатында ағаш отырғызып, жарты ғасырға жуық еңбек еткен.
«Атадан мал қалғанша, тал қалсын» деген үрдіспен Қамажай Құлжанқызы әулет тізгінін жалғап, теміржол саласын таңдайды. Ол 1984 жылы Атырау теміржол техникумын бітіріп шығып, сол кездегі Атырау жол бөлімшесі бастығы С.Серевентныйдың жолдамасымен Мақат ауданы, 402 бекетіне №159 машиналандырылған күрделі жол жөндеу мекемесіне жұмысқа кіреді.
«Теміржол саласына өз қалауыммен келдім. Қандай қиын жұмыс болсада еш мойымай жұмыс жасап келе жатырмын. Алғаш бекетте жұмыста жүрген шағымда төрт аяқты ағаш вагонда тұрып, ағаш жарып, екі шақырым жерден көмір тасып, от жағушы едік. Осы мекемеде басқа ұлт өкілдері де қызмет жасайтын еді, әртүрлі ұлт өкілдерімен қоян- қолтық араласып, жақсы жұмыс жасадық. Содан 1990 жылдары тоқырау кезінде ПМС-159 мекемесі жабылып, сол жылдары Мақат стансасындағы құрметті теміржолшы, Социалистік еңбек ері Латип Шахатов атындағы №3 өндірістік жол учаскесіне ауысып, қазіргі кезге дейін инженер-технолог маманы болып жұмыс жасап келемін.
Тағдыр жолымда да өмірлік серігім осы саланың маманы. Атыраулық теміржолшы- инженер Жүніс есімді жігітпен шаңырақ көтеріп, қызымыз өмірге келді. Ол да біздің жолымызды қуып, қазіргі таңда Мақат стансасында қызмет етеді», - деді Қамажай Құлжанқызы.
Бар ғұмырын тоғыз жолдың торабы саналатын ауданның теміржолына арнаған ол осы салада түрлі қызметте жасағанын айтады.
Кейіпкеріміздің сөзінше, бастапқыда жол монтеры, жол технигі, инженер, қойма меңгерушісі, еңбекақы және нормалаушы инженері қызметтерін абыроймен атқарған. Ол өзінің жұмысын адал атқарумен қатар, сол мекемеде артынан ерген бірнеше ізбасар дайындап, үйретіп шығады.
«Түсінген адамға да, жасаған адамға да жол жөндеу саласы - өте ауыр да, қиын сала. Бұл жұмыстың өз қауіптілігі мен жауапкершілігі қатар тұрады. Әсіресе жол монтерлеры мен жол шеберлерінің еңбегін айтпай кете алмаймын. Өйткені, қыстың қаһарлы боранында да, көктемнің жаңбырлы балшығында да, жаздың астап ыстығы мен күздің қара суығында да далада жұмыс жасайтын - сол жандар. Яғни теміржол бойында жүретін оларға қандай марапат берсе де лайықты деп білемін», - деді теміржолшы Қамажай Бағытова.
Осы ретте ол еліміздің аяулы арулары мен теміржолшы аруларды келіп жатқан мерекемен құттықтады.
«Құрметті де ардақты аналар, ару қыз - келіншектер, ардагер - зейнеткерлер, теміржолшылар! Сіздерді көгілдір көктемнің шуақты мерекесі халықаралық әйелдер күнімен шын жүректен құттықтаймын!
«Теміржол - экономиканың күре тамыры демекші, сіздердің ауыр да қиын, жауапты, ұшан-теңіз еңбектеріңіздің арқасында Мақат ауданының төрт бағыттан келетін, шығатын жүк пойыздары» межелі орынға уақытылы қатынап жатыр. Жол қауіпсіздігін сақтап, теміржолымыздың дамуына атсалысып жүрген сіздер әрбір шаңырақтың берекесі және ұжымның ұйытқысысыздар. Сіздерге шаңырақтың шаттығын, отбасының бақытын, мықты денсаулық пен ерен еңбекте толағай табыстар тілеймін!» - деп жүрекжарды тілегін арнады.
Иә, жаны нәзік әйел адамы қай саланы болмасын ілгері дамытады. «Әйел – бір қолымен бесікті тербетсе, екінші қолымен әлемді тербетеді» дегендей, әйел адамның кез келген ауқымды істерге араласа отыра, үлкен нәтижелерге қол жеткізе алатынын кейіпкерімізден де аңғаруға болады. Ол жұмысының ауырлығына қарамастан адалдық, табандылық пен жауапкершілік сынды ізгі қасиеттерді бойына жиған, бар күш-жігерін теміржол саласының дамуы мен отбасының жылуына арнаған жан.
Г.ЖҰБАНЫШҚАЛИЕВА
