Ауданда «Қыс-2019» республикалық командалық - штабтық  оқу-жаттығу жиыны өтті.  Оған 17 мекеме, 143 қызметкер, 30 техника жұмылдырылды.

Мақат желілік-өндірістік басқармасы мекемесінің автокөлік тұрақ алаңында аудандық азаматтық қорғау қызметінің жауапты қызметкерлері, сондай-ақ, ауылдың тіршілігін қамтамасыз ететін коммуналдық кәсіпорындар жиылды.

Шара барысында қыс мезгілінде туындайтын төтенше жағдайлар кезінде өзара іс-қимылдар жүйесі пысықталды. Аудандық азаматтық қорғау қызметтерінің күш-құралдары мен техникалардың дайындықтарын тексеру мақсатында саптық тұрғызылу өтіп, құрылымдар тексерілді.

Онда әр мекеменің басшысы мен қызметкерлері сап түзеп, қысқы дайындықтары бойынша есеп берді. Шараға аудан әкімі Шәкір Кейкин арнайы қатысып, жедел әрекет ету жасағының дайындық деңгейін бағалады.

«Қыс-2019» оқу-жаттығуы нәтижесінде жергілікті атқарушы органдар, ҚР ІІМ құрылымдық бөлімшелері, азаматтық қорғаныс қызметтері, ұйымдар мен кәсіпорындарға арналған жаттығулардың мақсаттарына қол жеткізілді. 26 әр түрлі құрал-жабдықтар және инертті материал, 18 тонна құм қоры дайындыққа келтірілді. Аудан бойынша 3800 тонна жанар-жағармай, 13 тонна әр түрлі азық-түлік 305 төсек орын нақтыланды.

Мекеме қызметкерлері қаһарлы қыста орын алатын төтенше жағдайларға сақадай сай екендіктеріне тәжірибе жүзінде көз жеткізді.

Сондай-ақ, құтқарушылар кез келген төтенше жағдайда күш біріктіре алатындарын көрсетті. Сала басшыларының айтуынша, биылғы қысқы маусымға дайындық тыңғылықты.

М.ІЗТҰРҒАНОВА

Сурет автордікі