Өткен аптада Мақат ауданының Төтенше жағдайлар бөлімі мен №8 ӨСБ қызметкерлері аудандық полиция бөлімінің қызметкерлерімен бірлесіп, Мақат кентіндегі автокөліктерді тоқтату арқылы рейдтік іс-шара ұйымдастырды.
Статистика бойынша аудан аумағында ағымдағы жылы 5 өрт оқиғасы тіркеліп, оның ішінде 4-еуі автокөліктерде орын алды. Өрттің себептері автокөліктердегі электр сымдарының қысқаша тұйықталуынан болып отыр.
Автокөліктердегі өрт оқиғаларының алдын алу мақсатында өткен рейд барысында автокөлік иелеріне өрттің пайда болуы мүмкіндігін төмендету үшін, жеке автокөліктің техникалық жарамды күйінде сақтау, зауыт нұсқауы талаптарына сәйкес пайдалану мен қызмет көрсету, электр жүйесіндегі барлық өзгерістер мен толықтырулар сапалы түрде арнайы мекемелерде жүргізілуі, сонымен қатар өрт қауіпсіздігі ережелерін қатаң сақтау қажеттілігі түсіндіріліп, өрт сөндіргіштері тексерілді. Барлық көлік жүргізушілерге «Автокөліктердегі өрт қауіпсіздігі» тақырыбында жадынамалар таратылды.
Рейд кезінде барлығы 25 автокөлік тоқтатылып, оның 5-еуінде өрт сөндіргіштер болмай, оларға ауызша ескерту жасалды. Бұл шара ай сайын өткізіліп, жалғасын табатын болады.
Автокөлік жүргізушілері: автокөліктердегі өрт қауіпсіздігі ережелерін қатаң сақтай отырып Сіз тек өзіңіздің мүлкіңізді ғана емес, өзіңіздің өміріңізбен жолаушыларды да оқыс оқиғалардан сақтай аласыз!
Мақат ауданының Төтенше жағдайлар бөлімі
