Қазіргі таңда интернет алаяқтық – қоғамымыздың ең өзекті және алаңдататын мәселелерінің біріне айналды. Осыған байланысты 13-15 мамыр аралығында Мақат станциясындағы Желілік полиция бөлімшесінің қызмет аумағында интернет алаяқтықтың алдын алуға бағытталған «ANTI FRAUD» жедел-профилактикалық іс-шарасы өткізілуде.
Интернет алаяқтықтың кең таралған түрлеріне келесілер жатады:
- Интернет арқылы сауда-саттық кезінде алдын ала төлем талап етіп, кейін алдау;
- Өздерін банк қызметкері ретінде таныстырып, азаматтардың жеке деректерін иемдену;
- Азаматтардың құжат көшірмелерін пайдалану арқылы олардың атына несие рәсімдеу;
- Қаржы пирамидалары;
- "Сіздің нөміріңіз ұтыс жеңіп алды" деген желеумен қоңырау шалу;
- SMS хабарламалар арқылы «тауар жеткізу үшін тек салық төлеңіз» деген сияқты жалған ақпарат тарату.
Мұндай алаяқтықтан қорғану үшін келесідей қауіпсіздік шараларын сақтау маңызды:
- Банк карталарының деректерін, CVV-кодтарын және құпия сөздерді ешкімге хабарламаңыз;
- Белгісіз және тексерілмеген сайттар арқылы алдын ала төлем жасамаңыз;
- Күмән тудыратын мәмілелерге ақша аудармаңыз;
- Алаяқтыққа күмән туындаған жағдайда дереу полицияға немесе банкке хабарласыңыз.
Азаматтарды сақтық шараларын ұстануға және интернеттегі алаяқтық әрекеттерге жол бермеуге шақырамыз!
Қ.Ералиев,
Мақат ст.ЖПб бастығы полиция майоры
