Атырау мұнай-газ университетінің 25 студенті қытайлық оқу ордасынан тегін онлайн білім алады, деп хабарлайды AtyrauPress тілшісі.
С.Өтебаев атындағы Атырау мұнай-газ университетінде қытайлық Цзинши институтының филиалы ашылды. Осылайша, студенттерге халықаралық білім беру бағдарламаларына қол жеткізіліп, Қытайдың жетекші университеттерінің профессорларынан дәріс алу мүмкіндігі туды. Өңірлік коммуникациялар қызметі мәлім еткендей, бұл бастама «Бір жол — бір белдеу» жобасы аясында шетелдік Petroleum Engineering Technology компаниясының демеушілігімен іске асуда. Енді университеттің 1,2-курс студенттері онлайн форматта оқып, мамырда Қытайдағы жазғы мектепке сапарламақ.
- Цзинши институты әлемдік деңгейдегі білім беру стандарттары және технологиялық жетістіктерімен танымал. Жоба мұнай-газ саласындағы заманауи технологиялар мен білім беру тәжірибелерін біріктіріп, болашақ инженерлердің кәсіби құзыреттілігін арттыруға мүмкіндік береді. Институтқа ағылшын тілін меңгерген, белсенді жастар таңдалды, - деді халықаралық қатынастар орталығының басшысы Алмагүл Тұрдағалиева.
Сәуле МАҒАУ
