42500 теңге төлеу ережелеріне жаңа өзгерістер мен толықтырулар енгізілді, деп хабарлайды Stan.kz ақпарат агенттігі.
Тиісті бұйрыққа еңбек және халықты әлеуметтік қорғау министрі Біржан Нұрымбетов қол қойды.
Енді 42500 теңге мөлшерінде әлеуметтік төлем алушылар санатына акциялары мен жарғылық капиталындағы қатысу үлестері тікелей немесе жанама түрде мемлекетке тиесілі заңды тұлғалардың, екінші деңгейдегі банктердің, банк операцияларының жекелеген түрлерін жүзеге асыратын ұйымдардың қызметкерлері кірмейді.
Әлеуметтік төлем тағайындалмайды:
1) БЖТ төлеушілерді қоспағанда, төтенше жағдай енгізілген күнге дейін он екі ай ішінде міндетті әлеуметтік сақтандыру жүйесіне қатысуының бір де бір ай өтілі жоқ адамдарға;
2) өтініш берген күніне дейін міндетті әлеуметтік сақтандыру жүйесіне қатысуының бір де бір ай өтілі жоқ БЖТ төлеушілерге;
3) төтенше жағдай енгізілген күнге дейін он екі ай ішінде жинақтаушы зейнетақы жүйесіне қатысуының бір де бір ай өтілі жоқ АҚС шарттар бойынша кіріс алатын жеке тұлғаларға;
4) еңбек немесе кәсіпкерлік қызметті (оның ішінде қашықтықтан) жалғастырған немесе ақылы еңбек демалысы берілген немесе жұмыс орындарының бірінде тоқтап тұру болған жағдайда, кәсіпкерлік қызметті қоса алғанда, екі немесе одан да көп жұмысты қоса атқаратын адамдарға;
5) егер бір мезгілде республикалық бюджеттен немесе қордан төленетін ай сайынғы зейнетақы мен әлеуметтік төлемдерді алушылар болып табылса, төтенше жағдай енгізілгеннен кейін БЖТ-ны алғаш рет төлеген адамдарға;
6) Қазақстан Республикасынан тыс жерге тұрақты тұруға кетуіне байланысты ішкі істер органдарында тіркеуден шығарылған адамдарға;
7) толық мемлекеттің қамсыздандыруындағы қылмыстық-атқару жүйесінің мекемелеріндегі адамдарға
Айта кетейік, егер өтініште төлемдер үшін банк және банктік шот нөмірі туралы ақпарат болмаса, онда жетіспейтін мәліметтерді төтенше жағдайдың қолданылу мерзімі аяқталған немесе оның күші жойылған күннен бастап бір айдан кешіктірмей мемлекеттік корпорация бөлімшесіне беруге болады.
Бұйрықтың толық нұсқасы еңбек және халықты әлеуметтік қорғау министрлігінің сайтында жарияланған.
Сурет: ашық дереккөз
