Мақат кенті әкімдігі үйінің үлкен залында шахматтан ардагерлер арасында аудандық турнир болып өтті.
Аудандық мәдениет, тілдерді дамыту дене шынықтыру және спорт бөлімі мен "Атырау - адалдық алаңы" жобалық кеңсесі біріге ұйымдастырған шара "Сыбайлас жемқорлыққа қарсы күрес - ортақ міндет" атты ұранды ұстанды.
8 қатысушы сынға түскен тартысты бәсекені қорытындылай келгенде Сәбит Халенов, Талас Байгуршимов, Шаяхмет Ишангалиев, Хасан Қараманов, Қалам Жанғабылов "Жеңіске деген жігері үшін" дипломдарымен марапатталды.
Жеңімпаздардың қатарына іліккен Көбейсін Саюпов жүлделі үштікті түйіндесе, Төлеуіш Иманалиев бұл жолы күмісті қанағат тұтты. Ал Р.Ғабдиев атындағы балалар өнер мектебінің ұстазы Естай Ғинаятов қарсылас шақ келтірмей, 1-орын иемденді.
Жүлдегерлерге арнайы медаль тапсырылып, барлық қатысушылар естелік сыйлықтардан құр қалған жоқ. "Атырау-адалдық алаңы" жобалық кеңсесінің ауданымыздағы өкілі Күлпәш Алишева мұндай жарыс өткен жылы жастардың арасында өтсе, биыл ардагерлеріміздің арасында ұйымдастырылып тұрғанын айтты.
Алдағы уақытта да сыбайлас жемқорлық көріністеріне нөлдік төзімділікке шақырып, салауатты өмір салтын насихаттайтын шаралар дәстүрлі түрде өтіп тұрмақ.
А.Есжан