Израильдік дәрігерлердің Атырау облысындағы жұмыс сапары жалғасуда, деп хабарлайды облыстық денсаулық сақтау басқармасының баспасөз қызметі.
Бүгін, 26 қазанда облыстық перинаталдық орталықта шетел мамандары бірден сегіз ота жасады. Оның ішінде 7 акушерлік (кесарь) және 1 гинекологиялық.
- Сондай-ақ, дәрігерлер модульдік аурухананың инфекциялық стационарының пациенттеріне де кеңес беріп, күрделі отаға қатысты. Израиль делегациясының Атырауға сапары осы аптаның соңына дейін жалғасады, дәрігерлер босандыру мекемелеріндегі барлық шұғыл жағдайларға қатысуға ниетті,-деп хабарлады облыстық денсаулық сақтау басқармасының баспасөз қызметі.
Естеріңізге сала кетейік, Атырау облысы әкімінің шақыруымен ана өлімінің көрсеткіштерін төмендету мақсатында аймаққа Израильден үш дәрігер шақырылған болатын. Дәрігерлер жергілікті мамандар үшін акушерлік және гинекология бойынша бірқатар шеберлік сағаттар өткізбек.
