Ұлтымыздың ұлы жазушысы Мұхтар Әуезов: « Халық пен халықты, адам мен адамды теңестіретін нәрсе - білім. Адамшылықты тез жүргізу үшін көп ой керек, ойлау үшін оқу керек» деп атап өткендей, білімнің бәсі қашан да жоғары. Қай заманда болмасын білектің күшімен емес, білімнің пайдасының арқасында мыңды жыққан. Ел Президенті де жас ұрпақтың білімге ұмтылуын ерекше атап жүр. Себебі, елдің ертеңі сол жастардың қолында екені бәрімізге белгілі.
Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында да көптеген түйіткілді мәселелерді қозғап кетті. Бірақ, барлығының артында білім тұрғаны аян. «Білімсіздің күні ғаріп, білімдінің күні жарық» дегендей, нарықтық заманда технологиясымен алға озған алпауыттар жетерлік. Солардың көшіне ілесу үшін де білім керек.
Ол жолда бірқатар жұмыстар жасалып та жатыр. Күні кеше ғана ауданымызда жастардың кітапқа деген құштарлығын арттыру мақсатында кітап оқудан сайыс өтті. «Kitap Time» деп аталған шарада үміткерлер Ә.Нұршайықовтың «Махаббат қызық мол жылдар» романы бойынша сұрақтарға жауап беріп, білімдерін бәйгеге салды.
Жарысты ұйымдастырушы аудандық Жастар ресурстық орталығы жеңімпаздар мен қатысушылардың барлығына диплом мен арнайы сыйлықтар табыс етті. Кітапқа құштар жастарымыз көбейсе, егеменді еліміздің болашағы да бағдарлы болмақ. Ерназ Алтайұлы
