Бүгін Мақат ауданының орталық алаңында 1 маусым - Халықаралық балаларды қорғау күніне орай балалармен жастардың музыкалық оркестрлері мен ансамбльдерінің мерекелік шеруі өтті.
Мақат және Доссор кентінде бір мезгілде ұйымдастырылған шеруге ауданның барлық білім беру ұйымдарынан 700-ден астам бала қамтылды.
Ауданда екінші рет ұйымдастырылған шеру балғындарға ерекше көңіл-күй сыйлады. Алдымен мерекеге сай безендірілген орталық көше бойымен көлік, мотоцикл, велосипедшілер бастап, қызылды-жасылды киінген барабаншылар, спортшылар, саз аспаптар оркестрі, суретшілер, мажоретка шашағын ұстаған шерушілер нақышты қимылдармен жүріп өтті. Осындай 10 колоннадан құралған ұжым бірінен соң бірі алаңға шығып, ән-жырларын төгілтіп, биді нақышына келтіре билеп, бар өнерлерін паш етті. Осылайша бүгінгі өткен шеру армандарды асқақтатып, өнерді шарықтатты. Балалар күні одан әрі думанды концерттік бағдарламаға ұласты.
Балғындарды мерейлі мерекемен құттықтаған аудан әкімінің орынбасары Н.Ерғалиев мереке аясында ұйымдастырылған сайыстардың жеңімпаздарын марапаттады. Сәні мен салтанаты келіскен мерекелік шара қатысушыларға ұмтылмас әсер сыйлағаны анық.
М.ІЗТҰРҒАНОВА,
суреттер автордікі
