Халықаралық жастар күніне орай Жеңіс саябағында аудандық жастар ресурстық орталығының ұйымдастыруымен «Жастық! Жалын! Жігер!» атты көңілді тимбилдинг өтті.
Аталған іс-шара басында аудан әкімінің орынбасары Ербол Ермағамбетов құттықтау сөз сөйлеп, белсенді жастарға сәттілік тіледі.
Тимбилдингке ауданға қарасты мекемелерден 60-қа жуық жастар қатысып, тартысты ойын көрсетті. Атап айтқанда, аудандық мәдениет үйінен «Мәдениетті жастар», Доссор мәдениет үйінен «Өнерлі жастар», аудандық балалар өнер мектебінен «Өнер қырандары», өнерпаз жастардан құралған "Шабыт" және аудандық жасыл ел сарбаздарынан құралған «Сад сарбаздары» командалары өзара сынға түсті.
Сайыста әртүрлі қызықты ойындардан құралған топтық ойындар ойнатылып, жастарға керемет көңіл-күй сыйлады. Спорттық ойындарды дене шынықтыру пәнінің мұғалімі Мұрат Қайыров қадағалап, төрешілік етті.
Алғырлық пен жылдамдықты сарапқа салған ойындар нәтижесінде «Өнерлі жастар» командасы бірінші орынға ие болса, «Мәдениетті жастар» екінші, «Өнер қырандары» командасы үшінші орынды өзара бөлісті.
Шара соңында аудан әкімінің орынбасары Ербол Ермағамбетов белсенді болған барлық командаларға алғыс хат пен естелік сыйлықтар табыстады. Өз кезегінде аудандық жастар ресурстық орталығының басшысы Әнуарбек Садықов та барша қатысушыларға рахметін айтып, өз алғысын білдірді.
Жоғары деңгейде өткен тимбилдинг мерекелік дастарханмен жалғасын тапты.
Ә.ҚАСЫМ
