Аптаның сәрсенбісі күні аудандық мәдениет үйінде жергілікті әнші, жыршы-термеші, сазгер Алтай Сәрсенбаевтың «Әке тілегі» атты шығармашылық ән кеші болып өтті.

Кешті республикалық байқаулардың лауреаты, әнші жерлесіміз Бақытбек Сартбаев жүргізіп, кеш басы Алтай Алпысбайұлының «Туған жер» атты төл туындысымен ашылды.

Сондай-ақ, кеш иесі «Аяулым» әнін орындар кезде шаңырақ көтергендеріне тура 25 жыл толғанын баса айтып, жұбайы Нұргүлге шоқ гүлдерін ұсынып, ерекше сезіммен әнін орындап берді. Одан әрі сахна төрінде кеш қонақтары «Наурыз» тобы, өңірімізге белгілі өнерпаздар халықаралық, республикалық байқаулардың жеңімпазы Мейіржан Қабдолов, Қазақстан Республикасы күйшілер одағының мүшесі, «Ерен еңбегі» үшін төс белгісінің иегері Жәнібек Жәмиев, республикалық «КТА» ойындарының жеңімпазы, әнші Қуаныш Кеңес және Айбек-Лена Сәрсенбаевтармен қатар, Алтай Сәрсенбаевтың ұл-қызы Нұрсәт пен Нұрай өз өнерлерін көрсетіп, көрермендердің қошеметіне бөленді.

Сондай-ақ, концерт соңын кеш иесінің «Атырау» әнін өзімен бірге өнер жолындағы достары орындап түйіндеп берсе, Облыстық Халық Шығармашылығы Орталығының басшысы Жәнібек Қайратұлы арнайы келіп, өнердегі ағасына жүрек жарды лебізін білдірді. Одан әрі сөз алған аудан әкімінің орынбасары Азамат Жәмшебайұлы өнер иесін мерейлі жасымен құттықтап, аудан әкімі атынан арнайы алғыс хат табыстап, иығына дәстүріміз бойынша шапан жапты.

Ә.ҚАСЫМ