Атырау облысы ішкі саясат басқармасының қолдауымен және Азаматтық бастамаларды қолдау орталығының тапсырысы бойынша “Жеті жарғы” қоғамдық қоры ұйымдастырған «Atyrau Intellectual Youth» жобасы өңірдегі жастардың зияткерлік әлеуетін дамытуға арналған ерекше бастама ретінде жоғары бағаланды. Жоба барысында 24 іс-шара өткізіліп, олардың әрқайсысы қатысушылардың білімін тереңдетуге, шығармашылық қабілеттерін ашуға және пайдалы уақыт өткізуіне бағытталған.
Жобаның ауқымдылығы мен мазмұны ерекше әсер қалдырды. Мысалы, интеллектуалдық білімге негізделген «Atyrau Quiz» жарыстарының қалалық, аудандық іріктеу кезеңдері және финалдық ойыны жастар арасында үлкен қызығушылық туғызды. Оған қоса, қатысушылар «Atyrau Quest» квест ойындарына, «Atyrau Puzzle Day» пазл құрастыру сайыстарына және «Oqyp Jarys» кітап оқу жарыстарына белсенді қатысты. Жастардың креативтілігі мен ойлау қабілетін дамытуға бағытталған MEET UP кездесулері мен WORKSHOP шеберлік сабақтары да ерекше қолдауға ие болды.
Сонымен қатар, пікірсайыс мәдениетін дамыту мақсатында «Fun Time» ауыспалы пікірсайыс кубогы ұйымдастырылып, қатысушылардың шешендік шеберлігі шыңдалды. Жастардың кәсіби және жеке дамуына ықпал ететін «4 QADAM» оқыту курстары да табысты өтті. Ал жоба шарықтау шегіне жеткенде өткізілген «Atyrau Intellect Fest» фестивалі жастардың шығармашылығы мен білімін кеңінен көрсетуге мүмкіндік берді.
Жобаның басты ерекшелігі – оның қатысушыларға берген мүмкіндіктерінде. 2100-ден астам жас жобаның түрлі іс-шараларына қатысып, өз қабілеттерін сынап, жаңа достар тапты. Ал әлеуметтік желілер мен бұқаралық ақпарат құралдары арқылы жобаның қамтылу аудиториясы 40 000-нан асты. Бұл көрсеткіштер «Atyrau Intellectual Youth» жобасының қаншалықты өзекті әрі қажет екенін дәлелдейді.
Жоба қорытындысы бойынша арнайы жария презентация ұйымдастырылып, іс-шаралардың нәтижелері тұрғындарға таныстырылды. Қатысушылар бұл жобаның олардың өміріне жаңа серпін бергенін, танымдық қабілеттерін арттырып, бос уақытты пайдалы өткізуге мүмкіндік жасағанын ерекше атап өтті. Атырау облысында мұндай жоба екінші рет өткізіліп отыр, және оның келешекте жалғасын табатынына сенім зор.
Жастардың зияткерлік әлеуетін дамытуға бағытталған бұл жоба – өңірдегі білім мен бәсекеге қабілеттілікті арттырудың маңызды қадамы. Мұндай бастамалар жас буынның жан-жақты дамуына ықпал етіп, олардың болашаққа сенімді қадам жасауына мүмкіндік береді.
Жайна МӘЛІМҚОЖА
