Мемлекет басшысы Қасым-Жомарт Тоқаев халыққа арнаған Жолдауларының бірінде «Қоршаған ортаны қорғау және экологиялық даму – еліміз үшін алдыңғы кезекте тұрған мәселе» деп атап көрсеткен еді. Сол себепті үнемі тазалық жұмыстарын жүргізіп, айналаны көгалдандыру қоғам алдындағы үлкен міндет етіп қойылған.
Бұл ретте кент аумағында аудан әкімінің 2023 жылғы 5 сәуірдегі №44 «Санитарлық тазалық жөніндегі жұмыстарды ұйымдастыру және аудан елді мекендерінің санитарлық жай-күйі мен көріктендірілуі жөнінде екі айлық байқау өткізу туралы» қаулысы негізінде биылғы жылдың 5 сәуір мен 27 мамыр, 18 қыркүйек пен 16 қараша аралығында көктемгі және күзгі тазалық айлығы болып бекітілді. Осы ретте аудан тазалығын сақтау мақсатында қыркүйек-қараша аралығындағы күзгі сенбілік айлығы жоспарлы түрде өтіп, мәресіне жетті.
Мақат кенті әкімі аппаратындағы жауапты мамандардың сөзінше, кент аумағындағы барлық мекемелер мен кәсіпорындар, мемлекеттік органдар, кәсіпкерлер кент тазалығына өз деңгейінде атсалысып, бөлінген сектор бойынша аймақтарын тазалаған.
«Жалпы күзгі тазалық айлығы өз деңгейінде өтті. Тазалық айлығына 3723 адам қатысып, кент аумағынан 577м3 қоқыс шығарылды. Бұл тұста тазалық айлығына белсенділік танытқан Мақат желілік өндірістік мекемесін ерекше айтуға болады. Яғни, мекеме қызметкерлері апта сайын шығып, бөлінген аймақты жан-жақты тазалады.
Одан бөлек, көктемгі көгалдандыру жұмыстары бойынша жарияланған мемлекеттік сатып алу конкурсының қорытындысымен жеңімпаздың көктемгі егіс егу жұмыстарын кешіктіру салдарынан, егу жұмыстары күзде ұйымдастырылып, кенттегі Азаттық, Б.Төлекбаев, Ж.Жұмағалиев көшелеріне 700 көшет отырғызылды», - дейді Мақат кенті әкімі аппаратының мамандары.
Осы ретте айта кетейік, өткен айда кенттегі Азаттық көшесінде орналасқан спорттық ойын алаңшасының жиегіне аудан әкімінің орынбасары және аудандық ардагерлер кеңесінің мүшелері, дербес бөлімдердің қатысуымен 150 көшет отырғызылған болатын.
Жалпы, қоршаған ортаға қатысты ұйымдастырылған шаралар арқылы халықтың экологиялық білімі мен мәдениеті қалыптасары сөзсіз. Сонықтан, тазалық мәселесі қашанда алдыңғы орында.
Ә.ҚАСЫМ
