Жақында аудан орталығындағы балалар мен жасөспірімдер спорт мектебінің футбол алаңында шағын футболдан қайырымдылық турнирі ұйымдастырылды.

16 команда қатысқан доп додасында кіші финал, яғни үшінші орын үшін талас мақаттық «Қуаныш» және құлсарылық «АбуБакр» командаларының арасында болды. Ойын нәтижесінде қола жүлдеге «Қуаныш» қол жеткізді. Ал финалдық кездесуде тағы бір Құлсарыдан келген «СМП-224» командасы жергілікті «Самраттан» басым түсті.

Турнирдің жекелеген үздіктері де назардан тыс қалмады. Атап айтар болсақ, Наурызбек Амандықов «СМП-224» үздік ойыншы, Бекзат Аманқос «Cамрат» үздік шабуылшы, Амандық Дюсенғалиев «АбуБакр» үздік қорғаушы, Ғалымжан Нарымбаев «Қуаныш») үздік қақпашы аталымдарымен марапатталды.

Қатысушылардан жиналған 300 мыңнан астам қаражат Бәйгетөбеде салынып жатқан мешіттің құрылысына жұмсалатын болады.

А.ЖҰМАБЕКҰЛЫ