Мақаттық волонтерлар «Дархандық күнін» ескерусіз қалдырмады

(0 Votes)

Биыл Наурыз мейрамын тойлаудың жаңа нұсқасы таныстырылған болатын. Ұлыс күнін 14 наурыздан 22 наурызға дейін тоғыз күн, тоғыз атаумен мерекелеу белгіленген-ді.

Бұл арқылы наурызды тек сахналық сипатта ғана тойламай, ұлттық мерекемізді жаңғыртудың жаңа дәстүрін қалыптастыру көзделді. Осы мақсатта 17 наурыз «Дархандық күніне» орай ауданның «Úmit-ART» волонтерлар тобы қайырымдылық акциясын жалғастырды. Жалпы бұл күні игі істер атқарылып, қайырымдылық жасалып, волонтерлыққа ұмтылатын іс-әрекеттер атқарылуы тиіс.

img_9363

Осы мақсатты орындау үшін еріктілер күннің суығында қызмет етіп, көшеде жүргендерге ыссы шай мен тәтті тіскебасар ұсынып, мейірім шуағын сыйлады. Ерікті жастардың ерікті ісіне қызметкерлер ізгі ілтипатын білдірді. Сондай-ақ, жастар жалғызбасты қарияның үйіне барып, қол көмегін көрсетті. Олар ауладағы қоқысты шығарып, айналасын ретке келтіріп берді. Бұл күні әртүрлі игі істердің жанынан табылып жүрген «Asar» волонтерлар тобы да қарап қалмады.

whatsapp-image-2020-03-17-at-16_10_34

Аудан орталығындағы «Демеу» қайырымдылық дүкеніне қолғабыс етіп, қайырымды істерімен көзге түсті. Дүкен ішін жинастырып, киімдерді реттестіріп, жайлы жағдай туғызды. Сондай-ақ, еріктілер дүкенге құр қол бармай, киім-кешек апарды.

Игі істің алғысына шабыттанған еріктілер алдағы уақытта қайырымдылық шаралары жалғасын табатынын жеткізді.

М.ІЗТҰРҒАНОВА

 

Мақат тынысы

COVID 19

covid