Фестивальге қала, аудандардан «Халықтық» атағы бар 16 театр мен 4 драма ұжымы қатысуда. Ереженің шарты бойынша «Халықтық» театрлар Б.Қорқытовтың шығармаларынан және еркін тақырыпта 45 минуттық қойылым көрсетсе, драма ұжымдары 25 минуттық қойылым қояды, деп хабарлайды Өңірлік коммуникациялар қызметі.
Іс-шараны ашқан облыстық ғылыми-әдістемелік халық шығармашылығы мен мәдени демалыс қызметтерін ұйымдастыру орталығының басшысы Жәнібек Аманиязов қатысушыларға сәттілік тіледі.
-Берік Қорқытовтың шығармашылығына арналған облыстық іс-шараның мақсаты – жергілікті жазушы, драматург, өлке тарихын зерттеуші Берік Қорқытовтың шығармаларын көпшілікке таныстыру. Сондай-ақ «Халықтық» театр ұжымдарының жұмысын қолдау, тәжірибе алмасу, дарынды актерлардың сахналау ерекшеліктерін шыңдау, театр, драма ұжымдарының жұмысын жаңаша жолға қою. Ал талапқа сай театрлар үш жыл сайын өтетін қайта рәсімдеуден «Халықтық» атағын қайта қорғайтын болса, ол осы фестиваль арқылы көрініс табады,- деді Ж.Аманиязов.
Айта кетейік, фестиваль 18 мамырға дейін болады. Өтетін жері А.Байжігітова 86а мекенжайында орналасқан облыстық ғылыми-әдістемелік халық шығармашылығы мен мәдени демалыс қызметтерін ұйымдастыру орталығы. Келем деушілерге кіру тегін.
