Қазақстан Президенті Қасым-Жомарт Тоқаевтың Ұлттық Құрылтайдағы сөзі елдің ауыл шаруашылығын жаңа деңгейге көтеруге бағытталған маңызды мәлімдеме болды.
Қазақстанның аграрлық әлеуеті зор екені бұрыннан белгілі, алайда оны толық пайдалану үшін жүйелі реформалар қажет. Өкінішке қарай, бұл салада жемқорлық пен тиімсіз басқарудың салдарынан көптеген мүмкіндіктер іске аспай қалды. Жалған мәліметтерге негізделген субсидиялау жүйесі, саланы дамытудың кешенді бағдарламасының болмауы, мемлекеттік қаржыландырудың тиімсіздігі – ауыл шаруашылығының кенже қалуына алып келген негізгі себептердің бірі.
Қазіргі таңда бұл мәселелерді шешу бағытында ауқымды жұмыстар атқарылып жатыр. Мемлекет аграрлық секторды қайта жандандыру үшін еңбек өнімділігін үш есе арттырып, жалпы өнім көлемін екі есе ұлғайту сияқты амбициялы мақсаттарды қойып отыр. Бұл үшін жаңа технологияларды енгізу, су және жер ресурстарын тиімді пайдалану, ғылым мен инновацияға негізделген жүйелі өзгерістер қажет. Сонымен қатар, фермерлерді қолдау, ауыл шаруашылығындағы жастардың үлесін арттыру, кооперативтерді дамыту да маңызды қадамдар болуы тиіс.
Президенттің бидай өндірісін терең өңдеу арқылы Қазақстанды әлемдік нарықтағы үздік он елдің қатарына қосу туралы тапсырмасы – стратегиялық бағыттардың бірі. Біздің ел тек шикізат өндіруші ғана емес, дайын өнім экспорттаушы мемлекетке айналуы керек. Бұл қосылған құнды арттырып қана қоймай, ауыл шаруашылығына тұрақты табыс әкелетін қуатты саланың қалыптасуына ықпал етеді.
Ауыл шаруашылығы саласының мамандары мен ардагерлері бұл бағытта нақты өзгерістердің қажет екенін бұрыннан айтып келеді. Мемлекеттік қолдау ашық әрі әділ болуы керек, ауыл шаруашылығына бөлінетін қаражат мақсатты түрде жұмсалуы тиіс. Сондай-ақ, су тапшылығы мәселесін шешу, фермерлерге жеңілдетілген несие беру, заманауи технологияларды енгізу, кадр даярлау сияқты маңызды қадамдар атқарылуы қажет.
Егер бұл реформалар сәтті жүзеге асса, Қазақстанның ауыл шаруашылығы шын мәнінде алпауыт аграрлық салаға айналып, әлемдік нарықта бәсекеге қабілетті бола алады. Бастысы – бұл бағыттағы жұмыстар нақты нәтижеге бағытталуы тиіс.
М.САБЫРҒАЛИЕВ
мемлекеттік қызмет саласының ардагері, зейнеткер
