Қазіргі әлемде елдің өркендеуін тек ғылым мен технологиямен өлшеу жеткіліксіз. Қоғамның тұрақтылығы мен өмір сапасын нақты қамтамасыз ететін – жұмысшы мамандықтары. Олар – экономиканың жүрегі, тіршіліктің тынысы. Алайда, өкінішке қарай, бұл мамандықтар көп жағдайда назардан тыс қалып келеді, беделі төмен бағаланады. Бұл – түбегейлі өзгеруі тиіс көзқарас.
Бүгінде жоғары оқу орнын бітіріп, жұмыс таппай жүрген жастар аз емес. Ал сонымен қатар, түрлі кәсіпорындарда дәнекерлеуші, электрик, құрылысшы, аспаз, техник сияқты мамандар жетіспей жатқаны жасырын емес. Бұл – еңбек нарығындағы нақты теңсіздікті көрсетеді. Демек, қоғамда жұмысшы мамандықтарының орнын қайтадан саралап, олардың құндылығын жүйелі түрде мойындауымыз қажет.
Жұмысшы – бұл тек қолымен істейтін адам емес. Ол – өзінің ісіне жауапкершілікпен қарайтын, кәсіби шеберлігін үнемі дамытып отыратын нағыз маман. Көп елдерде, әсіресе Германия, Финляндия, Жапония сынды дамыған мемлекеттерде техникалық және кәсіби мамандар жоғары бағаланады. Оларда жұмысшы болу – беделді, сұранысқа ие әрі тұрақты табыс көзі бар мамандық саналады. Бізге де осы бағыттағы көзқарасты қалыптастыру қажет.
Қазақстан үшін де бұл аса маңызды. Елде инфрақұрылым дамуда, өндіріс орындары ашылуда, ауыл шаруашылығы мен құрылыс қарқынды жүруде. Ал осы салалардың барлығы кәсіби жұмысшы кадрларға тәуелді. Демек, жұмысшы мамандықтары – елдің экономикалық қауіпсіздігін қамтамасыз ететін маңызды күш.
Жастарға дұрыс бағдар беру, еңбекке құрметті тәрбиелеу – отбасыдан, мектептен, қоғамнан басталуы тиіс. Жұмысшы мамандығын таңдау – жеңіл жол іздеу емес, керісінше, нақты өмірге икемделудің, дербес табыс табудың, өз жолыңды табудың көрінісі.
Қазіргі заман талабына сай техникалық және кәсіптік білім беру жүйесі үлкен мүмкіндік ұсынады: колледждерде дуальді оқыту енгізіліп, студенттер нақты өндіріс орындарында тәжірибе жинақтайды. Мемлекет тарапынан гранттар бөлініп, жастардың осы бағытқа қызығушылығы артып келеді. Бұл – болашақ үшін өте дұрыс қадам.
Қорыта айтқанда, жұмысшы мамандықтарына деген көзқарасты қоғам болып өзгерту – тек мамандық таңдауға емес, тұтас ұлт болашағына әсер ететін мәселе. Адал еңбек, кәсіби шеберлік пен табандылық – кез келген мемлекеттің даму негізі. Сондықтан жұмысшы – заманауи қоғамның нағыз батыры.
Сағыныш ҚАЙЫР
